०३ असोज २०८३, शनिबार

काठमाडौँ — संविधान दिवस तथा राष्ट्रिय दिवस, २०८३ को अवसरमा टुँडिखेलमा आयोजित विशेष समारोहलाई सम्बोधन गर्दै प्रधानमन्त्री वालेन्द्र शाह (बालेन)ले युवापुस्ताले सडकबाट उठाएको सुशासनको मागलाई सरकारले प्रविधिको प्रयोगमार्फत सुनिश्चित गर्ने दृढ संकल्प व्यक्त गरेका छन्। ऐतिहासिक ‘जेनजी’ आन्दोलनका सहीदहरूप्रति श्रद्धाञ्जली अर्पण गर्दै उनले अबको शासन व्यवस्था परम्परागत शैलीमा मात्र सीमित नरहने र कृत्रिम बुद्धिमत्ता (AI), डिजिटल पूर्वाधार, नवप्रवर्तन तथा साइबर सुरक्षालाई अगाडि सारेर ज्ञानमा आधारित अर्थतन्त्र निर्माण गरिने बताए।

प्रधानमन्त्री शाहले संविधान जतिसुकै उत्कृष्ट भए पनि त्यसलाई कार्यान्वयन गर्ने नेतृत्व इमानदार र सक्रिय नभए त्यो केवल ‘कागजको खोस्टो’ मात्रै बन्ने चेतावनी दिए। भ्रष्टाचार र दण्डहीनताको जरो गहिरो भए पनि त्यसलाई उखेल्न सरकार पूर्ण रूपमा प्रतिबद्ध रहेको र प्रशासनिक क्षेत्रमा शून्य सहनशीलता, राजनीतिक तटस्थता तथा योग्यता प्रणाली अपनाइएको उनको भनाइ थियो। साथै, हालैको विपद्को सन्दर्भ जोड्दै उनले पूर्वसूचना प्रणाली र जोखिम न्यूनीकरणलाई सरकारले सर्वोच्च प्राथमिकतामा राखेर काम गर्ने प्रतिबद्धता जनाए।