काठमाडौं ,माघ २१ : ललितपुरका हरिप्रसाद ढकालको एनआइसी बैंकमा रहेको खाताबाट दुई पटकमा चार लाख रुपैयाँ काटिए पछी निजको उजुरी पछि जावलाखेलमा रहेको जिल्ला प्रहरी परिसर ललितपुर अनुसन्धान सुरु गर्‍यो।

अनुसन्धानकै क्रममा प्रहरीले ८ जनालाई पक्राउ गर्‍यो। जसको लहरो हरि ढकालको मोबाइल बैङ्किङबाट घटेको प्रकरणसम्म जोडिएको छ।

परिसरको टोलीले भारतको बिहार प्रदेश घर भएका २९ वर्षीय अवधेश कुमार, सप्तरी कृष्णासवर गाउँपालिका घर भएका दिलीपकुमार चौधरी, पर्सा विन्दवासिनी बस्ने नगेन्द्र साह कानु, रौतहट रङपुर नगरपालिका घर भएका २७ वर्षीया रविना चौधरी, बारा कोलबी नगरपालिका घर भएका सन्तोष कुवँर, पर्सा वीरगन्ज महानगरपालिका घर भएका २८ वर्षीय राजु पटेल, २० वर्षीय साहिल परवेज र दिनेश राउत र शिवशङ्कर राउतलाई नियन्त्रणमा लिएको हो।

प्रहरीको अनुसन्धान उनीहरूले एउटा एप बनाएर अरूको मोबाइलको डाटा ह्याक गरेर रकम झिक्ने गरेको देखिएको छ। उनीहरूले यसरी धेरै मानिसलाई आफ्नो एपमार्फत ठगी गरेको परिसर ललितपुरका प्रमुख एसएसपी सिद्धिविक्रम शाहले बताए।

मात्र १२ पास गरेका युवक साहिल परबेजले ‘ नेपाली गर्ल’ नामको एप बनाए। जसमार्फत नै उनले ठगी गर्ने गरेको खुलेको छ। उनले युट्युब हेरेर नै एप बनाएको एसएसपी शाहको दाबी रहेको छ। जसमार्फत अहिलेसम्म २० जनाको ५० लाख रुपैयाँभन्दा बढी रकम झिकिसकेका छन्। यसरी ठगिनेहरूमा युवा पुस्ताहरू नै धेरै देखिएको छ। अहिलेसम्म ललितपुर परिसरबाहेक साइबर ब्युरोमा २० वटा र उपत्यका अपराध अनुसन्धान कार्यालयमा ७ वटा उजुरी परिसकेको छ। यसरी हेर्दा ५० लाख रुपैयाँभन्दा बढी ठगिएको छ।

प्रहरीले पक्राउ परेकाविरुद्ध उच्च अदालत पाटनबाट बैंकिङ कसुरमा म्याद थप गरेर अनुसन्धान गरिरहेको छ।