३० भदौ २०८३, मंगलबार

काठमाडौँ — विश्व फुटबल खेलाडी संघ (फिफ्प्रो) को युरोपेली निकाय ‘फिफ्प्रो युरोप’ ले फिफा अध्यक्ष जियानी इन्फान्टिनोद्वारा अघि सारिएको विश्वकपको व्यावसायिक अधिकार निजीकरण गर्ने असफल प्रयासपछि फिफा काउन्सिलको कार्यकारी निर्णय प्रक्रियामाथि तत्काल स्वतन्त्र छानबिन गर्न माग गरेको छ। रोयटर्सका अनुसार, फिफ्प्रो युरोपले फिफाको सर्वोच्च निकाय वा कुनै पनि नेतृत्वले एक्लै यस्ता दूरगामी प्रभाव पार्ने ठूला निर्णयहरू लिन नपाउने गरी सुशासन र संरचनात्मक सुधार हुनुपर्नेमा जोड दिएको छ। फिफाले ‘फिफा फरवार्ड इन्टरप्राइज’ नामक संयन्त्रमार्फत निजी लगानीकर्ताहरूलाई व्यावसायिक अधिकार बिक्री गर्ने प्रस्ताव चौतर्फी विरोधपछि फिर्ता लिँदै माफी मागे पनि फिफ्प्रोले भने केवल आन्तरिक समीक्षा र प्रक्रियागत सुधारले मात्र फुटबल समुदायको गुमेको विश्वास फर्किन नसक्ने स्पष्ट पारेको छ।

फिफ्प्रो युरोपले सार्वजनिक गरेको नयाँ प्रतिवेदन ‘प्लेयर आईक्यू’ र ‘फुटबल बेन्चमार्क’ को तथ्यांक उद्धृत गर्दै रोयटर्सले जनाए अनुसार, सन् २०२६ को विश्वकपमा सहभागी खेलाडीहरूमध्ये ९४ प्रतिशत बजार मूल्य (करिब १६.९ अर्ब युरो) युरोपेली क्लबहरूमा आवद्ध खेलाडीहरूको रहेको छ। प्रतिवेदनले विगत पाँच वटा विश्वकपका सम्पूर्ण २० वटा व्यक्तिगत पुरस्कार विजेता खेलाडीहरू युरोपेली क्लबमै कार्यरत रहेको देखाउँदै विश्व फुटबलको मुख्य आर्थिक र खेलगत आधारलाई जोगाउनु अनिवार्य रहेको उल्लेख गरेको छ। यसबाहेक, सन् २००६ मा विश्वकपको कुल राजस्वको १०.५ प्रतिशत रकम पुरस्कार स्वरूप सहभागी राष्ट्रहरूलाई बाँडिने गरेकोमा सन् २०२६ सम्म आइपुग्दा त्यो हिस्सा घटेर ७.७ प्रतिशतमा सीमित भएको प्रतिवेदनले औँल्याएको छ।  

यसै विषयलाई लिएर फिफ्प्रोले फिफा नेतृत्वमाथि “अध्यक्षीय अधिकारको चरम दुरुपयोग” को आरोप लगाउँदै राष्ट्रिय संघहरूसँगै खेलाडी, क्लब र लिगहरूलाई पनि निर्णय प्रक्रियामा औपचारिक प्रतिनिधित्व र मताधिकार दिइनुपर्ने माग राखेको छ। गोप्य रूपमा तयार पारिएको यो योजना सार्वजनिक भएपछि युरोपेली फुटबल निकाय (युइएफए) र खेलाडी संघहरूबाट तीव्र दबाब सिर्जना भएको थियो। रोयटर्सले यस विषयमा फिफाको प्रतिक्रिया लिन खोजे पनि यसबारे थप आधिकारिक भनाइ आइनसकेको जनाएको छ।