२९ भदौ २०८३, सोमबार

पृथ्वी राजमार्गअन्तर्गत धादिङको पहिरोग्रस्त कृष्णभीर क्षेत्रमा सडक भासिएर अवरुद्ध भएको यातायात सञ्चालन गर्न निर्माण गरिएको नयाँ सडक ट्रयाकको परीक्षण सफल भएको छ। नागढुङ्गा–मुग्लिन सडक आयोजना (पश्चिम खण्ड) ले निरन्तरको प्रयासपछि पहिरो गएको स्थानभन्दा माथिबाट करिब २५२ मिटर लामो र सात मिटर चौडा नयाँ ट्रयाक तयार पारेको हो। सडकको ग्रेडिङ सम्पन्न भएपछि सुरुमा खाली ग्यास बुलेट पठाएर परीक्षण गरिएको र परीक्षण सफल भएसँगै दुवैतातर्फबाट पालैपालो करिब ५० वटा सवारीसाधन सुरक्षित रूपमा पास गराइएको छ।

नयाँ ट्रयाक परीक्षण सफल भए पनि सडकलाई पूर्ण रूपमा सुरक्षित र नियमित बनाउन बाँकी कामहरू अघि बढाइँदै छ। आयोजनाका अनुसार मंगलबारदेखि उक्त स्थानमा ग्राभेल बिछ्याउने, नाली निर्माण गर्ने, पानी तर्काउने प्रविधि जडान गर्ने तथा सडकमाथिका चिराहरू पुर्ने काम सुरु गरिँदै छ। मौसमले साथ दिएमा र थप ठूलो पहिरो नआएमा आगामी तीनदेखि चार दिनभित्र सबै निर्माण सम्पन्न गरी पृथ्वी राजमार्गमा नियमित रूपमा दुईतर्फी सवारी सञ्चालन गराइनेछ।

यद्यपि, कृष्णभीरमा बारम्बार दोहोरिने यस्ता पहिरो र सडक भासिने समस्या समाधानमा सरकार र आयोजनाले देखाएको सुस्तताप्रति स्थानीय बासिन्दा, यात्रु तथा यातायात व्यवसायीहरूले तीव्र असन्तोष व्यक्त गरेका छन्। हरेक वर्ष मनसुन सुरु हुनासाथ देशकै मुख्य राजमार्ग ठप्प हुने र सर्वसाधारणले हप्तौंसम्म सास्ती भोग्नुपर्ने बाध्यता रहँदा पनि दीर्घकालीन रोकथामको उपाय नखोजेर अस्थायी ‘ट्रयाक’ र ‘प्याचवर्क’ मा मात्र सीमित भएको भन्दै सडक विभाग र आयोजनाको फितलो कार्यशैलीको चौतर्फी आलोचना भइरहेको छ।