२१ भदौ २०८३, आइतबार

नेपाल धितोपत्र बोर्ड (सेबोन) का अध्यक्ष डा. गोपालप्रसाद भट्टले देशको पुँजी बजारलाई आधुनिक, मर्यादित र पारदर्शी बनाउन नीतिगत तथा संरचनागत सुधार अति आवश्यक रहेको बताउनुभएको छ। ‘नेपाल क्यापिटल मार्केट डिस्कोर्स २०२६’ कार्यक्रमलाई सम्बोधन गर्दै उहाँले नेपाल स्टक एक्सचेन्ज (नेप्से) र समग्र सेयर बजारको विकासका लागि बोर्डले स्पष्ट मार्गचित्रसहित नीतिगत प्राथमिकताहरू अघि सारेको जानकारी गराउनुभयो।

अध्यक्ष भट्टले सेयर बजारमा प्रविधिको उच्चतम प्रयोग, नियमन क्षमताको अभिवृद्धि र लगानीकर्ताको हित संरक्षणलाई बोर्डको मुख्य प्राथमिकताको रूपमा प्रस्तुत गर्नुभयो। बजारमा बढ्दै गएको साना तथा ठूला लगानीकर्ताको पहुँचलाई व्यवस्थित गर्न डिजिटल पूर्वाधारलाई सुदृढ बनाउनुका साथै कारोबार तथा फछ्र्यौट प्रणालीलाई अन्तर्राष्ट्रिय स्तरको बनाउनुपर्नेमा उहाँले जोड दिनुभयो।

यसका साथै, धितोपत्र बोर्डले सूचीकृत कम्पनीहरूको वित्तीय पारदर्शिता कायम गराउन कडा नियमन लागू गर्ने र अवाञ्छित वा गैर-कानुनी कारोबार रोक्न बजार सुपरिवेक्षण प्रणालीलाई थप सशक्त बनाउने प्रतिबद्धता व्यक्त गरेको छ। नियामक निकायको सुशासन र लगानीकर्ताको विश्वास बढाएर मात्र नेपालको पुँजी बजारलाई देशको अर्थतन्त्रको बलियो स्तम्भका रूपमा स्थापित गर्न सकिने धारणा उहाँले राख्नुभयो।