२१ भदौ २०८३, आइतबार

बाढी र पहिरोका कारण पृथ्वी राजमार्गको कृष्णभीर लगायतका खण्डहरू अवरुद्ध भई ग्यास बोकेका बुलेट (ट्याङ्कर) हरू काठमाडौँ छिर्न नसकेपछि उपत्यकामा ग्यासको अभाव टार्न उपत्यकाबाहिरका जिल्लाहरूबाट दैनिक औसत ३५ हजार सिलिन्डर भरेर पठाउन थालिएको छ। काठमाडौँ उपत्यकामा सामान्य अवस्थामा दैनिक करिब ३५ हजार देखि ४० हजार सिलिन्डर ग्यास खपत हुने गर्छ। नियमित आपूर्ति प्रणाली ठप्प भएपछि नेपाल आयल निगम र नेपाल एलपी ग्यास उद्योग सङ्घको समन्वयमा तराई तथा आसपासका जिल्लाहरूमा रहेका बोटलिङ प्लान्टमार्फत वैकल्पिक रूपमा सिलिन्डर आपूर्ति भइरहेको छ।

उपत्यकामा ग्यास आपूर्ति गर्ने २२ वटा कम्पनीहरूमध्ये १८ वटाका प्लान्टमा बुलेट पुग्न नसकेपछि काठमाडौँमा रहेका खाली सिलिन्डरहरू ट्रकमार्फत चितवन, मकवानपुर (हेटौँडा), बारा, पर्सा, नवलपुर (गैँडाकोट) र धनुषाका उद्योगहरूसम्म पुर्‍याएर ग्यास भरिने गरिएको छ। नेपाल एलपी ग्यास उद्योग सङ्घका अनुसार बाबा, एचपी, नेपाल, त्रिवेणी, श्री, जानकी, सीताश्री, एभरेस्ट, सुगम लगायतका उद्योगहरूबाट भरिएका सिलिन्डरहरू वैकल्पिक मार्ग हुँदै काठमाडौँ भित्र्याइएको छ। त्यसैगरी, साल्ट ट्रेडिङ कर्पोरेसन (STC) ले पनि धादिङको जुगेखोलास्थित आफ्नो प्लान्टमा बुलेट पुग्न नसकेपछि निजी ग्यास उद्योगहरू (मनोज र बाबा ग्यास) सँग सहकार्य गरी आफ्ना खाली सिलिन्डरहरू भरेर काठमाडौँ पुर्‍याइरहेको छ।

ढुवानी व्यवस्थापनका लागि खाली सिलिन्डर बोकेका ट्रकहरू काठमाडौँबाट कान्ति लोकपथ हुँदै तराईतर्फ पठाइने र भरिएका सिलिन्डर बोकेका गाडीहरू हेटौँडा–भैँसे–पालुङ–नौबिसे (त्रिभुवन राजपथ) हुँदै काठमाडौँ भित्र्याइने गरिएको छ। यसरी उपत्यकाबाहिर सिलिन्डर भरेर लामो र घुमाउरो वैकल्पिक मार्गबाट ढुवानी गर्दा लागत बढेकाले नेपाल आयल निगमले यसरी आपूर्ति गरिएका सिलिन्डरको बिक्री मूल्यमा प्रतिसिलिन्डर रु. १०५.३८ थप गर्न अनुमति दिएको छ। यससँगै प्रतिसिलिन्डर रु. २,०६० रहेको खाना पकाउने ग्यासको मूल्य बढेर प्रतिसिलिन्डर रु. २,१६५.३८ कायम भएको छ। पृथ्वी राजमार्ग पूर्ण रूपमा सञ्चालनमा नआएसम्म घरायसी उपभोक्तालाई प्राथमिकतामा राखेर यो वैकल्पिक आपूर्ति प्रणाली कायम राखिने आयल निगमले जनाएको छ।