भदौ १४, २०८३ आइतबार

रसुवाको भोटेकोशी बाढीपीडितका लागि स्थापित प्रधानमन्त्री दैवी प्रकोप उद्धार कोषमा रकम जम्मा गरेको भन्दै भ्रम फैलाउने एक युवा रामेछापबाट पक्राउ परेका छन्। रामेछापको गोकुलगंगा गाउँपालिका वडा नं. २ निवासी ३२ वर्षीय भगवान् कार्कीले १ लाख २० हजार रुपैयाँ सहयोग गरेको देखाउन च्याट जीपीटी जस्ता एआई अर्थात कृत्रिम बौद्धिकता लाई प्रयोग गरी नक्कली बैंक स्टेटमेन्ट बनाएका थिए। उनले उक्त नक्कली स्टेटमेन्टका साथै आफ्नै व्यक्तिगत QR कोड सामाजिक सञ्जालमा राखेर मानिसहरूलाई ठगी गर्न खोजेको प्रहरीले खुलाएको छ। यस विषयमा थप सत्यतथ्य पत्ता लगाउन जिल्ला प्रहरी कार्यालय रामेछाप (मन्थली) ले उनीमाथि अनुसन्धान अगाडि बढाएको छ।

यस्तो विपद्‌को घडीमा पनि आफ्नो दुराशय र स्वार्थका लागि मानिसहरूले यसरी ठगी गर्न खोज्नु अत्यन्तै लाजमर्दो र दुःखद् कुरा हो। सामाजिक सञ्जालमा यस्ता प्रवृत्तिप्रति जनआक्रोश र घोर विरोध भइरहेको छ। संकटको फाइदा उठाएर समाजमा भ्रम फैलाउने र ठगी धन्दा चलाउने यस्ता व्यक्तिहरूलाई कानुनबमोजिम कडाभन्दा कडा सजाय हुनुपर्छ, ताकि भविष्यमा कसैले पनि यस्तो दुष्कर्म गर्ने हिम्मत नगरोस्।