उपराष्ट्रपति रामसहायप्रसाद यादवले उद्घाटन गर्नुभएको १८औं संस्करणको नाडा अटो शोको पहिलो दिनमै ३० हजारभन्दा बढी दर्शकले प्रदर्शनीको अवलोकन गरेका छन्। काठमाडौंमा आयोजित अटोमोबाइल क्षेत्रको यस वृहत् मेलामा नयाँ मोडलका सवारीसाधन, विद्युतीय गाडी (EV), मोटरसाइकल, स्कुटर तथा विभिन्न प्रविधिहरू मुख्य आकर्षणका रूपमा रहेका छन्। अवलोकनकर्ताहरूले विशेष गरी विद्युतीय सवारीसाधनको ब्याट्री रेन्ज, मूल्य, पावर, चार्जिङ समय र वारेन्टीका विषयमा विशेष चासो देखाएका छन्।

यस पटकको प्रदर्शनीमा सस्तो पारिवारिक गाडीदेखि २ करोड ३० लाख रुपैयाँसम्मका विलासी सवारीसाधनहरू राखिएका छन्। ५३ वटा सवारी ब्रान्ड र २०० भन्दा बढी स्टल सहभागी रहेको यस मेलामा विभिन्न कम्पनीहरूले नयाँ मोडलहरू समेत सार्वजनिक गरेका छन्। जसअन्तर्गत एमएडब्लू वृद्धि मोटर्सले डोङफेङका प्रिमियम ईभी, सिप्रदी ट्रेडिङले टाटा सिएरा ईभी, एसपीजी अटोमोबाइल्सले जेको जे-५ प्रो र एलआरआर मोटर्सले स्काईवेल बीई-११ बजारमा ल्याएका छन्। त्यसैगरी स्वदेशी उत्पादनतर्फ नेपालमै डिजाइन र निर्माण गरिएको ‘यात्री पी-२’ विद्युतीय स्कुटर र प्रदर्शनीमा राखिएका रोबोटले समेत अवलोकनकर्ताको ठूलो ध्यान खिचेका छन्।