२४ असोज २०८३, शनिबार

काठमाडौं : पोर्चुगलको राष्ट्रिय टिमसँगको विबाद र चर्चाका बीच मैदानमा फर्केका दिग्गज फुटबलर क्रिष्टियानो रोनाल्डोले क्लब फुटबलमा सानदार प्रदर्शन गरेका छन्। साउदी प्रो लिगअन्तर्गत भएको खेलमा अल-नासरले दिरियाह क्लबलाई ३-० गोल अन्तरले पराजित गर्दै सहज जित निकालेको छ। यस खेलमा टोलीका कप्तान तथा अनुभवी फरवार्ड रोनाल्डोले पहिलो हाफमै गोल गर्दै आफ्नो उत्कृष्ट लय कायम राखेका छन्।

भर्खरै सम्पन्न नेसनल लिगका खेलहरूका क्रममा पोर्चुगलका प्रशिक्षक जोर्गे जिसससँग भएको विवाद र टिम क्याम्प छाडेको घटनाले विश्व फुटबलमा ठूलै हलचल ल्याएको थियो। नर्वेविरुद्धको खेलमा बेन्चमा सीमित भएपछि असन्तुष्ट बनेका ४१ वर्षीय रोनाल्डोले प्रशिक्षकमाथि विश्वासको गम्भीर उल्लंघन भएको आरोप लगाएका थिए। यद्यपि, उनले अन्तर्राष्ट्रिय फुटबलबाट सन्यास भने नलिएको स्पष्ट पारिसकेका छन्। राष्ट्रिय टिमको यो तिक्ततापछि क्लब फर्केका रोनाल्डोलाई अल-नासरका समर्थकहरूले अल-अव्वाल पार्क रंगशालामा भव्य स्वागत गरेका थिए। खेलअनुसार समर्थकहरूले मैदानमा ‘महानता कमाइन्छ, फुटबलिङ इतिहासकै सर्वाधिक गोलकर्ता सीआर सेभेन’ लेखिएको ठूलो ब्यानर प्रर्दशन गरेर आफ्ना नायकप्रति समर्थन जनाएका थिए।

समर्थकहरूको साथ र हौसलालाई मैदानमा सार्थक तुल्याउँदै रोनाल्डोले खेलको २३औँ मिनेटमा नै अल-नासरका लागि पहिलो गोल गरे। किन्ग्स्ले कोमानको प्रहारलाई विपक्षी गोलकिपरले बचाएपछि रिबाउन्ड भएको बलमा रोनाल्डोले सहजै जाली चुमाएका थिए। यो उनको खेलजीवनको समग्रमा ९८०औँ गोलसमेत हो। यससँगै उनी आधिकारिक फुटबल खेलहरूमा १ हजार गोल पूरा गर्ने विश्वको पहिलो खेलाडी बन्ने आफ्नो लक्ष्यतर्फ थप अगाडि बढेका छन्।

पहिलो हाफमै खेलमा पकड जमाएको अल-नासरका लागि ३५औँ मिनेटमा सामु कोस्टाले जोआओ फेलिक्सको पासमा हेडरमार्फत दोस्रो गोल थपे। त्यसपछि खेलको ७७औँ मिनेटमा बायर्न म्युनिखका पूर्व विंगर किन्ग्स्ले कोमानले उत्कृष्ट गोल गर्दै टोलीको जित ३-० ले सुनिश्चित गरे। यस सिजनको लिगमा रोनाल्डोको यो चौथो गोल हो। मैदानभित्र र बाहिरका तमाम दबाबलाई पन्छाउँदै रोनाल्डोले दिएको यो दमदार प्रतिक्रियाले उनको खेलप्रतिको लगनशीलता र उच्च मनोबललाई फेरि एकपटक प्रमाणित गरेको छ।