असोज २२, २०८३ बिहीबार

नेपाल स्टक एक्सचेन्ज (नेप्से) परिसूचकमा अघिल्लो दिनको गिरावटपछि बिहीबार सामान्य सुधार देखिएको छ। कारोबार अवधिभर उतारचढावपूर्ण स्थितिमा रहेको नेप्से परिसूचक २.३१ अंकले बढेर २५७४.६५ विन्दुमा पुगेर बन्द भएको छ। अघिल्लो कारोबार दिन बुधबार ६.३८ अंकले घट्दै बजार २५७२ विन्दुमा झरेको थियो। परिसूचकमा झिनो सुधार आउँदा कारोबार रकम भने अघिल्लो दिनको तुलनामा केही बढेको छ। बिहीबार कुल ३५४ वटा स्क्रिप्सको १ करोड १२ लाख ३३ हजारभन्दा बढी कित्ता सेयर खरिदबिक्री हुँदा ३ अर्ब ९३ करोड ५ लाख रुपैयाँभन्दा बढीको कारोबार दर्ता भएको छ।

आजको कारोबारमा बजारमा मिश्रित प्रतिक्रिया देखिएको छ। कुल सूचीकृत कम्पनीहरूमध्ये १४० वटा स्टक्सको सेयर मूल्यमा वृद्धि हुँदा १२७ वटाको मूल्य घटेको छ भने ११ वटा कम्पनीको मूल्य स्थिर रहेको छ। उपसूचकतर्फ बैंकिङ, डेभलपमेन्ट बैंक, हाइड्रोपावर, इन्भेस्टमेन्ट र म्यानुफ्याक्चरिङसहित ७ वटा समूहको सूचक धनात्मक देखिएका छन्। कम्पनीगत हिसाबले कुथेली बुखारी स्मल हाइड्रोपावरको सेयर मूल्यमा सकारात्मक सर्किट लेभलमा कारोबार भएको छ भने स्नो रिभर्स, लक्ष्मी भ्यालु फन्ड–२ र मेघा म्युचुअल फन्ड–१ का सेयरधनीहरूले पनि ६ प्रतिशतभन्दा बढी कमाएका छन्। अर्कोतर्फ आरबीबी म्युचुअल फन्ड–२ का लगानीकर्ताले सर्वाधिक ८ प्रतिशतभन्दा बढी गुमाएका छन्। कुल कारोबार रकमका आधारमा घलेम्दी हाइड्रोपावर २६ करोड रुपैयाँको सेयर खरिदबिक्रीसहित शीर्ष स्थानमा रहन सफल भयो।