२०८३ असोज २२ बिहिबार

काठमाडौँ। भारतीय चर्चित अभिनेता नाना पाटेकरको आज बिहान ५:२० बजे निधन भएको छ । मणिपाल डा. शेखर साल्करका अनुसार गोवास्थित निवासमै हृदयाघातपछि पाटेकरको निधन भएको हो । उनलाई ४५ मिनेटसम्म लगातार सीपीआर दिएर बचाउने प्रयास गरिए पनि सफल हुन सकेन । पाटेकर ७५ वर्षका थिए ।

तीन पटक राष्ट्रिय चलचित्र पुरस्कार विजेता पाटेकरले सन् १९८९ को चर्चित चलचित्र ‘परिन्दा’ मा ‘अन्ना’ को भूमिका निर्वाह गर्दै उत्कृष्ट सहायक अभिनेताको राष्ट्रिय पुरस्कार प्राप्त गरेका थिए। त्यसपछि सन् १९९४ को ‘क्रान्तिवीर’ का लागि उत्कृष्ट अभिनेता र सन् १९९६ को ‘अग्निसाक्षी’ का लागि पुनः उत्कृष्ट सहायक अभिनेताको राष्ट्रिय पुरस्कार जितेका थिए।

हिन्दीका साथै मराठी चलचित्र क्षेत्रमा अतुलनीय योगदान पुर्‍याएका पाटेकरलाई सन् २०१३ मा भारत सरकारले चौथो सर्वोच्च नागरिक सम्मान ‘पद्मश्री’ बाट विभूषित गरेको थियो।पछिल्लो समय पनि उनी चलचित्रमा सक्रिय थिए । उनी अक्षय कुमार, अभिषेक बच्चन र रितेश देशमुखलगायतको अभिनय रहेको ‘हाउसफुल ५’ मा देखिएका थिए ।

त्यस्तै, विशाल भारद्वाज निर्देशित ‘ओ’रोमियो’मा शाहिद कपुर र तृप्ति डिमरीसँगै उनले प्रहरी अधिकारीको भूमिका निर्वाह गरेका थिए। अनिल कपुर र राधिका मदान अभिनीत ‘सुबेदार’मा पनि उनको विशेष उपस्थिति रहेको थियो ।