०१ असोज २०८३, बिहीबार

[काठमाडौँ]। अर्थमन्त्री डा. स्वर्णिम वाग्ले नेपाल र भारतबीचको आर्थिक, राजनीतिक तथा कूटनीतिक सम्बन्धलाई थप सुदृढ बनाउने उद्देश्यका साथ तीन दिने औपचारिक भ्रमणका लागि बिहीबार बिहान भारतको नयाँदिल्ली प्रस्थान गरेका छन्। भारत सरकारको औपचारिक निमन्त्रणामा छ सदस्यीय उच्चस्तरीय नेपाली प्रतिनिधिमण्डलको नेतृत्व गर्दै उनी बिहीबार बिहान ७:३५ बजेको त्रिभुवन अन्तर्राष्ट्रिय विमानस्थलको नियमित उडानमार्फत नयाँदिल्लीतर्फ लागेका हुन्।  

भ्रमणका क्रममा अर्थमन्त्री वाग्लेले द्विपक्षीय व्यापार, पूर्वाधार विकास र विशेष गरी नेपालमा हालै आएको प्राकृतिक विपद्पछिको पुनर्निर्माणमा भारतीय सहयोग तथा संयुक्त आर्थिक सहकार्यका विविध आयाममा केन्द्रित रहेर उच्चस्तरीय वार्ता गर्ने कार्यक्रम छ। नेपाली प्रतिनिधिमण्डलमा अर्थ मन्त्रालयका सहसचिव अमृत लम्साल, परराष्ट्र मन्त्रालयका सहसचिव गेहेन्द्र राजभण्डारी, नयाँदिल्लीस्थित नेपाली दूतावासका कार्यवाहक राजदूत/उपनियोग प्रमुख डा. सुरेन्द्र थापा, इकोनोमिक मिनिस्टर तारानाथ अधिकारी र मन्त्रीका निजी उपसचिव कञ्चन बस्नेत सहभागी छन्।  

भ्रमण तालिका अनुसार अर्थमन्त्री वाग्लेले बिहीबार साँझ नै भारतीय समकक्षी निर्मला सीतारमणसँग द्विपक्षीय औपचारिक वार्ता गर्नेछन्। उक्त बैठकमा दुई देशबीचको आर्थिक सहायता, व्यापारिक सहजता र विपद्पछिको पुनर्निर्माण कार्यमा वित्तीय एवं प्राविधिक साझेदारीका विषयमा गहन छलफल हुनेछ। यस्तै, शुक्रबार साँझ उहाँले भारतीय विदेशमन्त्री डा. एस. जयशङ्करसँग शिष्टाचार भेटघाट गर्ने कार्यक्रम तय भएको छ।

राजनीतिक भेटघाटका अतिरिक्त अर्थमन्त्री वाग्ले नयाँदिल्लीमा आयोजना हुने विभिन्न बौद्धिक तथा व्यावसायिक मञ्चहरूमा पनि सहभागी हुनेछन्। शुक्रबार पूर्वभारतीय विदेश सचिव श्याम शरणद्वारा आयोजित उच्चस्तरीय कूटनीतिक संवादमा मुख्य अतिथिका रूपमा सम्बोधन गर्ने कार्यक्रम छ भने शनिबार भारतीय उद्योग परिसङ्घले आयोजना गर्ने सम्मेलनमा भारतीय उद्योगी तथा व्यवसायीहरूलाई नेपालमा लगानीका सम्भावनाबारे जानकारी गराउनेछन्। सोही दिन वाग्लेले दिल्ली स्कूल अफ इकोनोमिक्समा विकास अर्थशास्त्रसम्बन्धी प्राज्ञिक अन्तरक्रियामा समेत भाग लिई शनिबार साँझ काठमाडौँ फर्किने कार्यतालिका छ।