विवाह समारोहमा बमबारीपछि इरान-अमेरिका भिडन्त: मध्यपूर्वमा पुनः युद्धको खतरा

In विश्व
September 2, 2026
Sushil Paudyal

१७ भदौ २०८३, बुधबार

इरानको दक्षिणी तटीय क्षेत्र सिरिकमा भएको अमेरिकी हवाई हमलामा एक बच्चासहित पाँच जना सर्वसाधारणको मृत्यु भएपछि इरानले मध्यपूर्वमा रहेका अमेरिकी सैन्य अखडाहरूमा व्यापक जवाफी आक्रमण सुरु गरेको छ। अमेरिकी सेन्ट्रल कमाण्ड (CENTCOM) का अनुसार हर्मुज जलडमरूमध्य क्षेत्रमा इरानी इस्लामिक रिभोलुसनरी गार्ड कर्प्स (IRGC) ले व्यापारिक जहाजहरूमा पारेको अवरोधको जवाफमा ती हमलाहरू गरिएका थिए। हमलाका क्रममा क्षेप्यास्त्रको टुक्रा विवाह समारोह भइरहेको एक घरमा खस्दा इरानी रेड क्रिसेन्टका अनुसार ५ जनाको ज्यान जानुका साथै ५० भन्दा बढी घाइते भएका छन्। अमेरिकी सेनाले भने आफ्ना कारबाहीमा सर्वसाधारणलाई कहिल्यै निशाना नबनाइने दाबी गरेको छ।

यस घटनाको आक्रोशमा इरानको रिभोलुसनरी गार्डले जोर्डन, इराक, कुवेत र बहराइनमा रहेका अमेरिकी सैन्य ठेगानाहरूलाई लक्षित गरी ब्यालिस्टिक क्षेप्यास्त्र र ड्रोन प्रहार गरेको छ। जोर्डनको अकाबास्थित अमेरिकी मरीन बेसलाई लक्षित गरी हानिएका १३ वटा क्षेप्यास्त्रमध्ये १० वटालाई जोर्डनको वायु रक्षा प्रणालीले हावामै नष्ट गरिदिएको थियो भने बाँकी निर्जन क्षेत्रमा खसेकाले कुनै मानवीय क्षति भएन। यसैगरी इराकको कुर्दिस्तान क्षेत्रमा रहेका अमेरिकी सैन्य गोदाम तथा मर्मत केन्द्रहरूमा पनि इरानी आक्रमणले क्षति पुऱ्याएको खबर छ।

दुवै देशबीच पूर्ववर्ती युद्धविराम सम्झौताको म्याद सकिएसँगै हर्मुज जलडमरूमध्य क्षेत्रमा समुद्री यातायात र सैन्य तनाव चरम विन्दुमा पुगेको छ। अमेरिकी राष्ट्रपति डोनाल्ड ट्रम्पले इरानले कुनै पनि किसिमको जवाफी कारबाही गरेमा अझ कडा र माथिल्लो स्तरको सैन्य हमलाको सामना गर्नुपर्ने चेतावनी दिएका छन्। अर्कोतर्फ, इरानी राष्ट्रपति मासौद पेजेस्कियानले अमेरिका पुनः सम्झौताको दायरामा फर्किए इरान पनि सोही अनुसार अघि बढ्न तयार रहने बताएका छन्।

तपाईंको प्रतिकृया