२०८३ भदौ १६ गते

काठमाडौं : पूर्वाधार विकास मन्त्रालय र राष्ट्रिय योजना आयोगको प्रारम्भिक अध्ययन अनुसार भोटेकोशीको बाढीले निजी आवास, सरकारी भवन र सडक पूर्वाधारमा गरी करिब ३४ अर्ब रुपैयाँ बराबरको ठूलो क्षति पुर्‍याएको छ। यस क्षतिमा जलविद्युत आयोजना तथा निजी व्यवसायमा भएको नोक्सानी समावेश गरिएको छैन। बाढीबाट कुल ७ हजार ५७० वटा सरकारी तथा निजी भवन डुबानमा परेका छन्, जसमध्ये रसुवाका ५५७ र नुवाकोटका ६९२ गरी कुल १,२५३ घरहरू पूर्ण रूपमा नष्ट भएका छन् भने ६ हजार ३१७ घरमा आंशिक क्षति पुगेको छ। घर तथा भवनहरू नष्ट हुँदा १२ अर्ब ५३ करोड र सडक तथा पुल पूर्वाधारमा २१ अर्ब १५ करोड रुपैयाँको क्षति भएको अनुमान छ। विस्थापित परिवारका लागि अस्थायी आवास निर्माण गर्न ९० करोड र स्थायी घर बनाउन करिब ५ अर्ब रुपैयाँ लाग्नेछ, जसका लागि सरकारले सुरक्षित स्थानमा जग्गा खोजेर प्रतिपरिवार ७ लाख रुपैयाँसम्म अनुदान दिने तयारी गरिरहेको छ।

सडक विभागका अनुसार भोटेकोशी र त्रिशूली नदीका ३१ वटा पुलहरू बाढीले बगाएको छ। सडक पूर्वाधारको पूर्ण पुनर्निर्माणका लागि अब ५० अर्ब रुपैयाँभन्दा बढी बजेट लाग्ने अनुमान गरिएको छ। हाल गल्छी-बेत्रावती ४० किलोमिटर सडक क्षेत्रको लेदो हटाउन तथा देवीघाट, त्रिशुली बजार र बेत्रावतीमा तत्कालै बेलीब्रिज हाल्न ३ करोड २५ लाख रुपैयाँ बजेट र १५ भन्दा बढी हेभी उपकरणसहित ५० जना प्राविधिकहरू परिचालन गरिएको छ। यस्तै, काठमाडौंको मुख्य सम्पर्क मार्ग पृथ्वी राजमार्गको कृष्णभीर र परेवाभीरमा सडक खसेपछि काठमाडौंसँगको यातायात प्रभावित भएको छ। स्थिति सहज बनाउन फिस्लिङ र पेग्ली क्षेत्रको बीचमा डेढ किलोमिटर नयाँ ट्र्याक खोल्ने काम सुरु गरिएको छ भने कृष्णभीरमा भित्तो काटेर सडक खुलाउने विषयमा विज्ञहरूसँग छलफल भइरहेको छ। सडक सहज नभएसम्मका लागि इन्धन र ग्यासका ठूला सवारीसाधनलाई राति कान्ति लोकपथबाट र साना सवारी साधनलाई त्रिभुवन राजपथबाट आउजाउ गर्ने व्यवस्था मिलाइएको छ।