१५ भदौ २०८३, सोमबार

मलेसियाको वाङ्गेस्थित युकेएम वाइएसडी ओभल क्रिकेट मैदानमा भएको एसीसी प्रिमियर कपको आफ्नो पहिलो खेलमा नेपालले बहराइनमाथि ७ विकेटको सानदार जित दर्ता गरेको छ। बहराइनले प्रस्तुत गरेको ८८ रनको सहज लक्ष्य नेपालले २१ ओभरमा ३ विकेट गुमाउँदै प्राप्त गर्यो। नेपालको जितमा ओपनर अर्जुन कुमालले सर्वाधिक ३६ रनको अविजित योगदान दिए भने रोहित पौडेल १९ रनमा अविजित रहे। यसैगरी आसिफ शेखले १८ रन र देव खनालले १० रन जोडे। बहराइनका लागि बलिङतर्फ तीनै विकेट इम्रान जावेद अन्वरले लिएका थिए। नेपालले अब आफ्नो दोस्रो खेल बिहीबार मलेसियासँग खेल्नेछ।

त्यसअघि टस हारेर पहिले ब्याटिङको निम्तो पाएको बहराइन ३६.२ ओभरमा मात्र ८७ रन बनाउँदै अलआउट भएको थियो। बहराइनलाई सस्तैमा समेट्न नेपालका कप्तान सन्दीप लामिछानेले अत्यन्तै किफायती बलिङ गर्दै १० ओभरमा ४ मेडनसहित मात्र १४ रन खर्चेर ५ विकेट लिए। उनलाई साथ दिँदै ललित राजवंशीले ३ र करण केसीले २ विकेट हात पारेका थिए। बहराइनका लागि सही जवाफले १५, मोहम्मद वासिमले १३ र अलि दाउदले १० रन बनाउनुबाहेक अन्य कुनै पनि ब्याटरले दोहोरो अङ्कमा रन जोड्न सकेनन्।