भदौ १४, २०८३ आइतबार

नेपालमा हालै आएको बाढी तथा प्राकृतिक विपद्‌बाट प्रभावित बासिन्दाहरूका लागि अमेरिकाले आफ्नो सहायता रकम उल्लेख्य रूपमा वृद्धि गर्दै ३६ लाख अमेरिकी डलरभन्दा बढी को जीवनरक्षक मानवीय सहायता प्रदान गर्ने घोषणा गरेको छ।

विपद्‌लगत्तै सुरुमा अमेरिकी सरकारले ५ लाख अमेरिकी डलर बराबरको तत्काल आपत्कालीन सहायता घोषणा गरेको थियो। उक्त प्रारम्भिक रकम प्रभावितहरूका लागि अस्थायी आवास, सुरक्षित खानेपानी, सरसफाइ र अत्यावश्यक राहत सामग्री वितरणमा प्रयोग गर्ने जनाइएको थियो।

तर बाढीका कारण रसुवा तथा आसपासका क्षेत्रमा भएको क्षतिको गम्भीरता र दायरालाई ध्यानमा राख्दै अमेरिकी विदेश मन्त्रालयले सहयोग रकम बढाएर ३६ लाख डलरभन्दा बढी पुर्‍याएको हो। विस्तारित सहायताअन्तर्गत बाढी प्रभावित १० हजार घरपरिवारलाई आगामी ३ महिनासम्मका लागि आपत्कालीन खाद्यान्न उपलब्ध गराइनेछ।

अमेरिकी विदेश मन्त्रालयले सामाजिक सञ्जालमार्फत सन्देश जारी गर्दै यस कठिन घडीमा अमेरिकी सरकार र जनता नेपाली जनताको साथमा रहेको प्रस्ट पारेको छ। साथै, राहत तथा उद्धार कार्यमा सहयोग पुर्‍याउनुका साथै प्रभावित क्षेत्रमा रहेका आफ्ना नागरिकहरूको सुरक्षालाई पनि सर्वोच्च प्राथमिकतामा राखिएको मन्त्रालयले उल्लेख गरेको छ।