आगन्तुक रिसोर्टको आइपीओ बिक्री प्रबन्धकमा प्रभु क्यापिटल नियुक्त

In Headlines, खेल
August 26, 2026
Sushil Paudyal

१० भाद्र २०८३, बुधबार

काठमाडौं । आगन्तुक रिसोर्टले सर्वसाधारणलाई प्रारम्भिक सार्वजनिक निष्कासन (आइपीओ) गर्ने कार्यका लागि प्रभु क्यापिटललाई शेयर निष्कासन तथा बिक्री प्रबन्धकमा नियुक्त गरेको छ। भदौ ८ गते, (२५ अगस्ट २०२६) सोमबार आयोजित एक विशेष समारोहका बीच दुवै पक्षबीच निष्कासन सम्झौतापत्रमा हस्ताक्षर भएको छ। सम्झौतापत्रमा आगन्तुक रिसोर्टका तर्फबाट प्रमुख कार्यकारी अधिकृत आर्य शमशेर जबरा र प्रभु क्यापिटलका तर्फबाट प्रबन्ध सञ्चालक आशीष गौचनले हस्ताक्षर गर्नुभएको छ।

कम्पनीले आफ्नो कुल जारी पुँजीको ३० प्रतिशत शेयर सर्वसाधारणमा बिक्री निष्कासन गर्ने निर्णय गरेको छ। निष्कासनबाट संकलन हुने पूँजीलाई दीर्घकालीन पूँजी व्यवस्थापन र पूर्वाधार विकासमा उपयोग गरिने लक्ष्य राखिएको छ। IPO निष्कासन तथा बिक्री प्रक्रियासँग सम्बन्धित सम्पूर्ण कार्यहरू प्रचलित ऐन, नियम, निर्देशिका एवं नियामकीय मापदण्डको पूर्ण पालना गर्दै सम्पन्न गरिनेछ।

आगन्तुक रिसोर्टले आफ्ना ग्राहकहरूलाई अत्याधुनिक आतिथ्य सेवा प्रदान गर्दै पाँचतारे स्तरको एकीकृत रिसोर्टका रूपमा स्तरोन्नति गर्ने दीर्घकालीन योजना अघि सारेको छ। प्राकृतिक सौन्दर्य, आकर्षक भौगोलिक अवस्थिति र आधुनिक पूर्वाधारको उत्कृष्ट संगम रहेको यस रिसोर्टमा स्वदेशी तथा विदेशी पर्यटकहरूलाई लक्षित गरी आवास, भोजन तथा मनोरञ्जनका उच्चस्तरीय सुविधाहरू उपलब्ध गराइँदै आएको छ। मुगल वास्तुकला शैलीमा निर्माण गरिएको यो रिसोर्ट विशेष गरी फुर्सदको समय बिताउन, पारिवारिक बसाइ, कर्पोरेट कार्यक्रम, सम्मेलन तथा विवाह जस्ता सामाजिक समारोहका लागि एक प्रमुख रोजाइ बन्दै गएको छ। रिसोर्टका विभिन्न कोठा तथा निजी बाल्कोनीबाटै २२ वटा मनोरम हिमाली शृंखलाहरूको प्रत्यक्ष दृश्यावलोकन गर्न सकिनु यसको मुख्य आकर्षण हो।

रिसोर्टको पहुँच र यातायात सुविधाको दृष्टिले पनि यो निकै अनुकूल स्थानमा अवस्थित छ। कोटेश्वरदेखि धुलिखेलसम्मको सडकखण्डको स्तरोन्नति तथा सुधार कार्य अन्तिम चरणमा पुगेकाले अब सामान्य यातायातको अवस्थामा काठमाडौंबाट करिब ४५ मिनेटमै रिसोर्ट पुग्न सकिने भएको छ। रिसोर्टसँग पर्याप्त आफ्नै जग्गा रहेकाले आगामी दिनमा थप आधुनिक पूर्वाधार निर्माण र सेवा विस्तार गर्न कम्पनीलाई सहज हुने देखिन्छ।

तपाईंको प्रतिकृया