स्पेन र जापान विश्वकपको क्वार्टरफाइलनमा

साउन २०, २०८० शनिबार

अक्ल्यान्ड : ऐताना बोनमतीको दुई गोलप्रेरित स्पेनले अन्तिम १६ मा स्वीटजरल्यान्डलाई ५–१ को नतिजामा पराजित गर्दै फिफा महिला विश्वकपको क्वार्टरफाइनलमा स्थान बनाएको छ।

न्युजिल्यान्डको अक्ल्यान्डस्थित इडेन पार्कमा भएको खेलको पाँचौं मिनेटमा बोनमतीले गोल गर्दै स्पेनलाई अग्रता दिलाएकी थिइन्।

त्यसको ६ मिनेट नबित्दै स्पेनकै लाया कोडिनाले आत्मघाति गोल गरेसँगै खेल बराबरीमा पुगेको थियो। त्यसपछि आक्रमक बनेको स्पेनले अल्बा रडोन्डोले १७औं मिनेटमा गरेको गोलसँगै पुनः अग्रता लियो।

स्पेनका लागि सशक्त प्रदर्शन गरेकी बोनमतीले ३६औं मिनेटमा व्यक्तिगत दोस्रो तथा स्पेनका लागि तेस्रो गोल गरेकी थिइन्। कोडिनाले ४५औं मिनेटमा स्पेनको अग्रता ४–१ मा लम्ब्याएकी थिइन्।

दोस्रो हाफमा पनि युरोपकै प्रतिद्वन्द्वीमाथि हाबी बनेको स्पेनका लागि ७०औं मिनेटमा जेनिफर हेर्मोसोले गोल गर्दै ५–१ को जित सुनिश्चित गरिन्।

आजै भएको अर्को अन्तिम १६ को खेलमा नर्वेलाई ३–१ ले परातिज गर्दै एसियाली मुलुक जापान पनि अन्तिम आठमा पुगेको छ। न्युजिल्यान्डकै वेलिङ्टनमा भएको खेलको १५औैं मिनेटमा नर्वेकी एन्ग्रिड एन्गेनले गरेको आत्मघाति गोलसँगै जापानले अग्रता लिएको थियो।

त्यसको पाँच मिनेट नबित्दै गुरो रेइटेनले नर्वेका लागि बराबरी गोल फर्काएकी थिइन्। पहिलो हाफ १–१ मा बराबरीमा सकिए पनि एक पटकको च्याम्पियन नर्वेले दोस्रो हाफमा एक गोल फर्काएर दुई गोल खायो।

जापानका लागि रिसा सिमिजु र हिनता मियाजावाले एक–एक गोल गरेका थिए। जितसँगै क्वार्टरफाइनलमा पुगेको स्पेनले नेदरल्यान्ड्स र दक्षिण अफ्रिकाको विजेतासँग सेमिफाइनल प्रवेशका लागि खेल्ने छ। यस्तै, जापानले स्वीडेन र अमेरिकाबीचको विजेतासँग खेल्ने छ।

क्वार्टरफाइनल प्रवेशका लागि भोलि हुने खेलमा स्वीडेन र अमेरिका तथा नेदरल्यान्ड्स र दक्षिण अफ्रिका आमनेसामने हुनेछन्।

तपाईंको प्रतिकृया