मंगलबार, जेठ १६, २०८०

हिँजो भएको आइपिएल २०२३ को फाइनलमा डकवर्थ लेविस पद्धतिको आधारमा चेन्नई सुपर किंग्सले गुजरात टाइटन्सलाई ५ विकेटले हराउँदै पाँचौं पटक च्याम्पियन बनेको छ ।

अहमदावादमा वर्षाले प्रभावित भएको खेलमा चेन्नईले १५ ओभरमा १७१ रनको लक्ष्य पाएको थियो। जुन लक्ष्य चेन्नईले अन्तिम बलमा ५ विकेटको क्षतिमा पूरा गर्‍यो। रविन्द्र जडेजाले अन्तिम बलमा चौका प्रहार गरेपछि चेन्नई सुपरकिंग्सले आइपिएल २०२३ को उपाधि जितेको हो।

चेन्नईका लागि ओपनरद्वय ऋतुराज गायकवाडले १६ बलमा २६ रन र डेवन कनवेले २५ बलमा ४७ रन जोडे।यसैगरी अजिन्का राहाणे २७ रन, अम्बाती रायदु १९ र कप्तान महेन्द्रसिंह धोनी शून्यमा आउट भए। शिवम् दुवेले नटआउट ३२ रन र जडेजाले नटआउट १५ रन जोडे।

अन्तिम ओभरमा जितका लागि १३ रन चाहिएको चेन्नईका लागि दुवे र जडेजाले चार बलसम्म ३ रन मात्र जोडेका थिए। पाँचौ बलमा जडेजाले गुजरातका मोहित शर्मालाई छक्का प्रहार गरे। त्यसपछि जितका लागि अन्तिम बलमा चौका चाहिएको थियो जसमा जडेजाले चौका नै प्रहार गर्दै चेन्नईलाई च्याम्पियन बनाए।

त्यसअघि टस हारेर पहिले ब्याटिङ गरेको गुजरातले २० ओभरमा ४ विकेटको क्षतिमा २१४ रन जोडेको थियो।

उसका लागि साई सुदर्शनले ९६ रन जोडे। उनले ४७ बलमा ८ चौका र ६ छक्का हिर्काए। ऋद्धिमान साहले ५४ रन र शुभमन गिलले ३९ रन जोडे। बलिङमा चेन्नईका मथीशाले दुई विकेट लिए।

चेन्नईले यसअघि २०१०, २०११, २०१८ र २०२१ मा उपाधि जितेको थियो । यो संगै पाँचपटक जितेर मुम्बई इन्डियन्ससँग रहेको सर्वाधिक पाँच जित उपाधिको कीर्तिमान चेन्नईले बराबर गरेको छ ।

उपविजेतामै सीमित बनेको गुजरातका शुभमन गिल प्लेयर अफ दि सिरिज भए। उनले प्रतियोगिताभरमा सर्वाधिक रन जोड्ने क्रममा ८९० रन जोडे।