आइतबार ३१ बैशाख, २०८०

काठमाडौँ l नक्कली भुटानी शरणार्थी प्रकरणमा फरार रहेका पूर्वउपप्रधानमन्त्री तथा नेकपा (एमाले)का सचिव टोपबहादुर रायमाझी पक्राउ परेका छन्। पक्राउ पुर्जी जारी भएको करिब डेढ साता पछि उनि पक्राउ परेका हुन् ।

जिल्ला प्रहरी परिसरका काठमाडौंका प्रमुख एसएसपी दानबहादुर कार्कीका अनुसार रायमाझी आइतबार बुढानीलकण्ठबाट पक्राउ परेका हुन् ।

नक्कली भुटानी शरणार्थी बनाएर ठगेको प्रकरणमा उनका छोरा सन्दीपलाई भने प्रहरीले पक्राउ गरिसकेको छ।

यसअघि पक्राउ परेका व्यक्तिहरूले बयान दिनेक्रममा टोपबहादुर र सन्दीपको नाम लिएपछि काठमाडौं जिल्ला अदालतले उनी र उनका छोरा सन्दीपविरूद्ध पक्राउ पुर्जी जारी गरेको थियो।

सोही प्रकरणमा पूर्वगृहमन्त्री बालकृष्ण खाण पक्राउ परिसकेका छन्। वैशाख २७ गते खाण र उनका सहयोगी नरेन्द्र केसीलाई खाणको निवासबाट पक्राउ परेका थिए ।