१० वटा एजेन्डा सहित एमाले केन्द्रीय कमिटी बैठक आजबाट

In Headlines
May 11, 2023
Sushil Paudyal

२८ बैशाख, २०८०

काठमाडौँ । च्यासलस्थित केन्द्रीय कार्यालयमा आजबाट नेकपा एमालेको केन्द्रीय कमिटी बैठक पूर्व तयार एजेन्डा सहित सुरु हुँदै छ ।

केन्द्रीय कमिटी बैठकमा पार्टीका अध्यक्ष केपी शर्मा ओलीले राजनीतिक प्रतिवेदन पेस गर्ने एजेन्डासमेत तय गरिए सगै केन्द्रीय कमिटी बैठकका लागि १० वटा एजेन्डा तय गरेको छ ।

बैठकले चौथो केन्द्रीय कमिटी बैठकपछि भएका सचिवालय र स्थायी कमिटी बैठकले गरेका निर्णयको जानकारी र अनुमोदन गराउने एजेन्डासमेत छ । अनुशासन आयोग, लेखा आयोग र निर्वाचन आयोग र केन्द्रीय सल्लाहाकार परिषद्ले केन्द्रीय कमिटी बैठकमा आफ्नो प्रतिवेदन प्रस्तुत गर्ने प्रचार विभाग प्रमुख पृथ्वीसुब्बा गुरुङले बताए ।

समीक्षा प्रतिवेदन गरिसकेपछि केन्द्रीय कमिटी बैठकमा मिसन ग्रासरुटबारे छलफल गरिने उनको भनाइ छ । यस्तै, मिसन ग्रासरुट अभियानको सातवटै भौगोलिक र दुईवटा गैरभौगोलिक प्रदेशको समीक्षा प्रतिवेदन सम्बन्धित प्रदेशमा खटिएका पार्टीका सचिवले पेस गर्ने प्रचार विभाग प्रमुख गुरुङले जानकारी दिए ।

गुरुङका अनुसार मिसन ग्रासरुट अभियानलाई आधार मानेर पार्टीले वार्षिक कार्ययोजना बनाइनेछ । बैठकले पार्टीले नवप्रवेशीलाई व्यवस्थापन गर्न सम्बन्धमा र समसामयिक राजनीतिक प्रस्तावमाथि छलफल गर्नेसमेत एजेन्डा रहेको उनले बताए ।

पक्राउ पुर्जी जारी भए पनि फरार रहेका पार्टी सचिव टोपबहादुर रायमाझीको विषयमा केन्द्रीय कमिटी बैठकमा छलफल हुने नेताहरू बताएका छन् । एमालेले रायमाझीलाई निलम्बन भने गरिसकेको छ । बैठक शनिबार सकिनेछ ।

तपाईंको प्रतिकृया