मंगलबार, २६ बैशाख २०८०

हेटौँडा । बागमती प्रदेश सरकार गठन भएको डेढ महिना बितिसकेको छ तर मन्त्रिपरिषद् अझै पूर्णता पाएको छैन। नेकपा माओवादी केन्द्र नेतृत्वको सरकारले पूर्णता पाउन नसक्दा आर्थिक वर्ष २०८०/०८१ को बजेट निर्माणमा समेत असर पर्न थालेको छ । उता नेपाली कांग्रेसले सरकार विस्तारका लागि दिएको समयसीमा पनि समाप्त भइसकेको छ ।

सत्ता गठबन्धनमा रहेका तीन दलमध्ये नेपाली कांग्रेस र नेकपा एकीकृत समाजवादीबीच भागबन्डामा कुरा नमिल्दा बागमती सरकारले अहिलेसम्म पूर्णता पाउन नसकेको हो। बागमती प्रदेशका कूल ११ मन्त्रालयमध्ये अझै पाँचवटा खाली छन्। जुन कांग्रेस र एकीकृत समाजवादीबीच बाँडफाँड गर्नुपर्नेछ। तर तीमध्ये कांग्रेसले चारवटा र एकीकृत समाजवादीले दुईवटा आफूले पाउनुपर्ने दाबी गरिरहेका छन्।

तत्कालीन अवस्थामा प्रदेशका ११ मन्त्रालयमध्ये नेकपा माओवादी केन्द्रलाई ४, नेकपा एमालेलाई ४ र राप्रपालाई ३ मन्त्रालय भागबण्डा गरेर सरकारलाई पूर्णता दिइएको थियो । राष्ट्रपति निर्वाचनमा उक्त गठबन्धन भत्किन पुग्यो र कांग्रेस, माओवादी केन्द्र, एकीकृत समाजवादी र हाम्रो नेपाली पार्टीको समीकरणमा सरकार टिकिरहेको छ ।

सरकार विस्तार हुन नसक्नुमा माओवादी र कांग्रेसले एकअर्कालाई आरोप लगाइरहेका छन् । कांग्रेसले आफ्नो भागमा परेको मन्त्रालयमा मन्त्रीहरूको नाम नपठाउँदा मन्त्रिपरिषद् विस्तारमा ढिलाइ भएको मुख्यमन्त्री जम्कट्टेलको दाबी छ । उनले कांग्रेसले सरकारमा सहभागी हुने मन्त्रीहरूको नाम टुंगो लगाउन नसक्दा समस्या भएको बताए ।

कांग्रेसले भने मुख्यमन्त्री जम्कट्टेल आफ्नो प्रतिबद्धताबाट पछि हट्दा समस्या भएको आरोप लगाएको छ । आर्थिक मामिलामन्त्रीसमेत रहेका कांग्रेस बागमती प्रदेश दलका नेता बहादुरसिंह लामाले सुरुमा मुख्यमन्त्री जम्कट्टेलले बोलेको कुरामा अडिग नहुँदा समस्या भएको दाबी गरे ।