परराष्ट्रमन्त्री एनपी साउद बेलायत जाने

In Headlines
May 4, 2023
Sushil Paudyal

२०८० वैशाख १९ गते

काठमाडौं । परराष्ट्रमन्त्री एनपी साउद आज बेलायतका राजा चार्ल्स तृतीयको राज्याभिषेकमा नेपालको तर्फबाट सहभागिता जनाउन बिहान ११ बजेको उडानमार्फत बेलायत जाँदैछन्। चार्ल्स तृतीयको राज्याभिषेक वैशाख २३ गते (मे ६ तारिख) का लागि तोकिएको छ ।

राज्याभिषेकमा सहभागी भई २६ वैशाखमा साउद काठमाडौं फर्किने स्वकिय सचिव दीपककुमार जोशीले जानकारी दिए।

चार्ल्स तृतीयको राज्याभिषेकमा सहभागी हुन नेपालबाट राष्ट्रपति रामचन्द्र पौडेल जाने कार्यक्रम थियो। तर पौडेलको स्वास्थ्यमा समस्या देखिएपछि लामो समय भारतमा उनको उपचार गरिएको थियो। हालै काठमाडौं फर्किएका पौडेलको स्वास्थ्य प्रतिकूलताका कारण साउदले सहभागिता जनाउन लागेका हुन्।

यसअघि सन् २००३ मा तत्कालीन राजा ज्ञानेन्द्रले राष्ट्रप्रमुखको हैसियतमा बेलायत भ्रमण गरेका थिए । त्यसअघि स्वर्गीय राजा वीरेन्द्रले सन् १९८० र १९९५ मा तथा स्वर्गीय राजा महेन्द्रले सन् १९६० मा बेलायत भ्रमण गरेका थिए । नेपालका राष्ट्रपतिद्वय डा. रामवरण यादव र विद्यादेवी भण्डारी कसैको पनि बेलायत भ्रमण भएन ।

वकिङघम राजप्रासादका अनुसार राज्याभिषेक समारोहमा झण्डै दुई हजार पाहुनालाई आमन्त्रण गरिएको छ । समारोहमा संसारभरका राजनेता, राष्ट्र तथा सरकार प्रमुख, राजारानी एवम् राजपरिवार सदस्य, विश्वका विभिन्न देशका प्रतिष्ठित व्यक्ति उपस्थित हुने अपेक्षा छ ।

बेलायतमा ७ दशकपछि राज्याभिषेकको तयारी द्रुत गतिमा भइरहेको छ । वेष्टमिनिष्टर आबीमा सन् १०६६ देखि राज्याभिषेक समारोह हुँदै आएका छन् ।

गत सेप्टेम्बरमा महारानी एलिजावेथ द्वितीयको निधन भएपछि राजसिंहासन सम्हालेका राजा चार्ल्सको राज्याभिषेक समारोहमा ‘क्विन कन्सोर्ट’ पदवी पाएकी क्यामिलाले पनि रानी मेरीको मुकुट लगाउनेछिन् ।

तपाईंको प्रतिकृया