अमेरिकामा नेपाली मुलका भण्डारीको कम्पनीलाई ‘एक्सपोर्टर अफ द इयर २०२३’ पुरस्कार

मंगलबार, वैशाख १९, २०८०

काठमाडौं । संयुक्त राज्य अमेरिकामा व्यवसाय गरिरहेका नेपाली मुलका राज भण्डारीको कम्पनीले एक्सपोर्टर अफ द इयर २०२३ पुरस्कार प्राप्त गरेको छ ।

भण्डारी सञ्चालक रहेको साइनसिक्स कम्पनीलाई यो पुरस्कार उपलब्ध गराएको हो । अमेरिकी राष्ट्रपति जो बाइडेन र उपराष्ट्रपति कला ह्यारिसले पुरस्कार तथा सम्मान प्रदान गरेका हुन् ।

पुरस्कार तथा सम्मानपछि भण्डारीले सामाजिक सञ्जाल फेसबुकमा ह्वाइट हाउसमा राष्ट्रपति बाइडेन र उपराष्ट्रपति ह्यारिस दुवैसँग भेट्न पाउँदा खुसी महसुस गरेको लेखेका छन् ।

उत्तरी क्यारोलिनामा मुख्यालय रहेको साइनसिक्सलाई अमेरिकी साना व्यवसाय प्रशासन (एसबीए) ले सन् २०२३ को निर्यातको पुरस्कारका लागि छनौट गरेको हो ।

“विश्वभरबाट ग्राहकहरूको बढ्दो सूचीको साथ साइनसिक्सले राजस्व बढाउन, विविधिकरण गर्न र अन्तर्राष्ट्रिय व्यापारका अन्य धेरै फाइदा प्राप्त गर्न एसबीएका ट्रेड उपकरण प्रयोग गरेको हो,” अमेरिकी साना व्यवसाय प्रशासनका प्रमुख प्रशासक इसाबेला कासिलास गुजम्यानले भनेकी छन् ।

सन् १९८५ मा स्थापना भएदेखि साइनसिक्सले हाई पर्फमेन्स तरल क्रोमेटोग्राफी र मास स्पेक्ट्रोमेट्री उत्पादन गरेको छ । औषधि परीक्षण, प्रदूषण विश्लेषण, किटनाशक पत्ता लगाउने लगायतका विभिन्न क्षेत्रमा यसको प्रयोग हुन्छ ।

उत्तरी क्यारोलिनामा मुख्यालय र मिनेसोटामा निर्माण कारखाना भएको साइन्सिक्सका मालिक भण्डारी एवं अपरेसन म्यानेजर रञ्जन कार्की र ग्लोबल मार्केटिङका निर्देशक लिसा बामफोर्डसहित कम्पनीमा २५ कर्मचारी रहेका छन् ।

सन् २०२१ मा कम्पनीले एसबीएको राज्य व्यापार विस्तार कार्यक्रम (एसटीईपी)मार्फत २१ हजार अमेरिकी डलर अनुदान प्राप्त गरेको थियो । यसले अन्तर्राष्ट्रिय व्यापार शोमा भाग लिन, विदेशी वितरकहरूलाई भेट्न र वेबसाइट अन्तर्राष्ट्रियकरण लगायतमा मद्दत गरेको एसबीएले जनाएको छ ।

यससँगै अहिले साइनसिक्सको कुल बिक्रीको एक तिहाई हिस्सा निर्यातको छ, जुन सन् २०२० अनुदान पाउनुभन्दा अघिल्लो वर्षको तुलनामा १० प्रतिशतले बढी हो । साइनसिक्स र अन्य राष्ट्रिय साना व्यापार सप्ताहका (एनएसबीडब्लू) पुरस्कार विजेताहरूलाई अप्रिल ३० देखि मे २ सम्म वासिंगटन डीसीमा सम्मानित गरिएको हो ।

विगत ६० वर्षदेखि अमेरिकी राष्ट्रपतिले उद्यमी र साना व्यवसायका मालिकको महत्वपूर्ण योगदानलाई राष्ट्रिय साना व्यापार सप्ताहको अवसरमा पुरस्कृत एवं सम्मानित गर्दै आएका छन् ।

तपाईंको प्रतिकृया