युक्रेन र रसियाबीच २०० भन्दा बढी युद्धबन्दी आदानप्रदान

मंगलबार । चैत २८, २०७९

युक्रेन र रुसले २०० भन्दा बढी युद्धबन्दी आदानप्रदान गरेका छन् । रुससँगको युद्धबन्दी आदानप्रदान सम्झौताअन्तर्गत सोमबार एक सय युक्रेनी बन्दी रिहा भएका हुन् । रुससँगको पछिल्लो कैदी आदानप्रदानमा २० महिलासहित एक सय युक्रेनी बन्दी रिहा भएका युक्रेनी अधिकारीहरूले बताएका छन् ।

रुसको रक्षा मन्त्रालयले युक्रेनसँग भएको सम्झौताअनुसार युक्रेनको हिरासतबाट १०६ जना रुसी सैनिकलाई रिहा गरिएको जनाएको छ साथै युक्रेनका राष्ट्रपति भोलोडिमिर जेलेन्स्कीका चिफ अफ स्टाफ एन्ड्री येर्माकले रुसले १०० जना युक्रेनी कैदीलाई रिहा गरेको बताएका छन् ।

रुसबाट रिहा भएकाहरूमा युक्रेनी सेनाका जवान, राष्ट्रिय गार्ड र नौसेनाका जवान र सीमा सुरक्षा बलका सदस्य रहेका युक्रेनी राष्ट्रपतिको कार्यालयका प्रमुख एन्ड्री येर्माकले बताएका छन् । रिहा भएकामध्ये केही घाइते तथा केही गम्भीर बिरामी छन् ।

यसैबीच, युद्धबन्दीको उपचारका निम्ति समन्वय गर्ने युक्रेनी कार्यालयले गम्भीर घाइते भएका पाँच जना रुसी सैनिकलाई रुससमक्ष हस्तान्तरण गरेको छ ।

किएभले उनीहरूलाई जेनेभा अभिसन्धिअनुसार रुसलाई हस्तान्तरण गरेको हो । मार्च २०२२ देखि रुससँगको बन्दी आदानप्रदानअन्तर्गत हालसम्म दुई हजारभन्दा बढी युक्रेनी मुक्त भएका छन् ।

तपाईंको प्रतिकृया