११ चैत २०७९, शनिबार

करिब साढे तीन वर्षको अवधिमा २४ खेल खेल्दा मात्र आठमा जित हात पारेको नेपाली क्रिकेट टिम भारतीय मोन्टी देसाईको प्रशिक्षकत्वमा अन्तिम १२ मध्ये ११ खेल जितेर एकदिवसीय मान्यता मात्र जोगाएन, विश्वकप छनोटमा पनि स्वतः चयन भयो, जुन विश्व क्रिकेटमा नै एक चमत्कारका रूपमा लिइएको छ ।

करिब चार वर्षअघि नेपाल आईसीसी विश्वकप क्रिकेट लिग–२ मार्फत विश्वकप छनोटको ग्लोबल चयनमा पुग्ने र एकदिवसीय मान्यता जोगाउने अभियानमा मात्र निस्केको थियो । यस अवधिमा लिग–२ मा सहभागी सात राष्ट्रले घरमा र बाहिर गरी कुल ३६–३६ खेल खेल्नुपथ्र्यो । त्यसपछि शीर्ष पाँचमा रहन सके एकदिवसीय मान्यताप्राप्त हुने र शीर्ष तीनमा स्थान बनाउने सके विश्वकप छनोटमा स्वतः चयन हुने प्रावधान रहेको थियो, जुन अभियानमा नेपालको सुरुवात निकै कमजोर रह्यो ।

नेपाल सुरुदेखि नै पुछारबाट दोस्रो स्थान माथि उक्लन सकेको थिएन । नेपाल राष्ट्रिय क्रिकेट टिमको प्रदर्शन ओरालोतर्फ त थियो नै, नेपाली घरेलु क्रिकेटको चर्चा विश्वमा नकारात्मक रूपमा भयो । तत्कालीन कप्तान सन्दीप लामिछाने नाबालिग बलात्कारको आरोपमा पक्राउ परे । केही समयपछि नेपाली राष्ट्रिय क्रिकेटर स्पट फिक्सिङ आरोपमा पक्राउ परे । यसरी नेपाली क्रिकेटको मैदानभित्र र बाहिर दुवैको हाल बेहाल भयो ।

यसबीच दुई महिनाअघि नेपाली क्रिकेट टिमका प्रशिक्षकमा भारतीय मोन्टी देसाई नियुक्त भए । नेपाली क्रिकेट टिमका पछिल्ला चार विदेशी प्रशिक्षक उमेश पटवाल (भारत), डेभ ह्वाटमोर (अस्ट्रेलिया), पुबुद दसनायके (श्रीलङ्का) र मनोज प्रभाकरं (भारत)ले आआफ्नो कार्यकाल नै पूरा नहुँदै राजीनामा दिएक थियो ; जसले गर्दा नेपाली क्रिकेट टिम भद्रगोलको स्थितिमा थियो । यस्तोमा मोन्टीबाट नेपाली क्रिकेट समर्थकलाई खासै उत्साह थिएन तर प्रशिक्षक देसाई उद्धारकर्ता बनेर प्रस्तुत भए । देसाईले नेपाली क्रिकेट टिममा जादु भरिदिएका छन् ।

अब आगामी जुन–जुलाईमा जिम्बाब्वेमा हुने विश्वकप छनोटमा नेपाल खेल्नेछ, जुन प्रतियोगितामा नेपालले अहिलेसम्मकै सबभन्दा उच्च दस टिमसँग प्रतिस्पर्धा गर्नेछ । विश्वकप छनोटमा वेस्टइन्डिज, श्रीलङ्का र दक्षिण अफ्रिकामध्ये दुई टिम पनि हुनेछन् । अन्य टिममा जिम्बाब्वे, आयरल्यान्ड र नेदरल्यान्ड्स रहेका छन् । यसबाहेक यसै महिना नामिबियामा छ राष्ट्रबीच हुने प्लेअफमा शीर्ष दुई स्थान रहने टिमहरू पनि विश्वकप ग्लोबल छनोट खेल्न योग्य हुनेछन् । यस विश्वकप छनोटबाट दुई टिम भारतमा हुने एकदिवसीय विश्वकपमा खेल्न चयन हुने प्रावधान रहेको छ ।

आईसीसी एकदिवसीय मान्यता प्राप्त सगै वार्षिक करोडौँको बजेट नेपाल जस्तो आर्थिक कठिनाई भएको देशले पाउनेछ र सो रकमले नेपालको क्रिकेट विकासका लागि अत्यावश्यक स्तरीय प्रशिक्षक, अभ्यास, भ्रमण, खेलाडीको भत्ता, नियमित प्रशिक्षणजस्ता कार्य सहज हुनेछ । अब नेपालका लागि थप चार वर्ष अन्तर्राष्ट्रिय एक्सपोजर पनि बढ्नेछ ।

नेपाल सरकारले पनि क्रिकेट टिमलाई बधाई कार्यक्रम, विभिन्न पुरस्कारको घोषणा मात्र गर्ने होइन । हाल पनि क्रिकेटरमा बधाई र नगद पुरस्कारको वर्षा भइरहेको छ, जुन नराम्रो होइन तर सरकारले क्रिकेटको साँच्चिकै प्रवद्र्धन गर्ने हो भने सरोकारवालासँग सहकार्य गरी भौतिक संरचना, लगानी अनुकूल वातावरण र घरेलु क्रिकेट संरचना बलियो बनाउन सहयोग गर्नुपर्छ । नेपाल सरकार र क्यानले अब चुनौतीको पहाड अगाडि छ भन्ने बोध गनुपर्छ किनभने सफलतालाई निरन्तरता दिने काम पक्कै पनि सजिलो हुँदैन ।

गो.प बाट