तनहुँ जलविद्युत आयोजना : दुई वटै सुरुङ छेडियो

२९ फागुन २०७९, सोमवार

तनहुँ, फागुन २९ गते। तनहुँको ऋषिङ गाउँपालिका-१ झापुटारमा निर्माणाधीन १४० मेगावाट क्षमताको तनहुँ जलविद्युत आयोजनाको डाइभर्सन सुरुङ-२ छेडिएको छ। यसअघि सुरुङ-१ छेडिएको थियो।

तनहुँ हाइड्रो पावर लिमिटेडका प्रबन्धक इन्जिनियर श्यामजी भण्डारीले जानकारी दिए अनुसार नदीको पानी निकास गर्नका लागि अस्थायी रूपमा प्रयोग गर्ने गरी ६२६.९२ मिटर लम्बाइको डाइभर्सन सुरुङ छेडिएको उहाँले जानकारी दिनुभयो। डेढ महिना अघि ५३९ मिटर लम्बाइको डाइभर्सन सुरुङ-१ छेडिएको थियो।

दुवै टनेल ११.४ मिटर व्यास (गोलाकार)को रहेको आयोजनाले जनाएको छ। आयोजनाको हालसम्म ३५.३४ प्रतिशत काम पूरा भएको आयोजनाका प्रमुख राजाभाइ शिल्पकारले जानकारी दिनुभयो। आयोजनाको काम तीन चरणमा भइरहेको छ। अहिलेसम्म ३१ दशमलव ८२ प्रतिशत वित्तीय प्रगति भएको छ। यस अवधिमा १३ अर्ब ७५ करोड ६७ लाख ५० हजार रुपियाँ खर्च भएको छ।

आयोजनाको पहिलो प्याकेज अन्तर्गत १४० मिटर अग्लो बाँध लगायतका संरचना सोङ्ग दा कर्पोरेसन, भियतनाम-कालिका कन्स्ट्रक्सन प्रा.लि. नेपाल जे.भी.ले निर्माण गरिरहेको छ ।

आयोजनाको सुरुङ, विद्युत गृह निर्माणलगायत अन्य काम दोस्रो प्याकेजमा सिनो हाइड्रो, चीनले गरिरहेको छ। आयोजनाको तेस्रो प्याकेज अन्तरगत दमौलीबाट चितवनको भरतपुरसम्म २२० केभीको डबल सर्किट प्रसारण लाइन निर्माण कार्य केइसी, भारतले गरिरहेको छ। आयोजनाको समग्र निर्माण २०८३ असारभित्र सक्ने लक्ष्य राखिएको छ।

प्रसारण लाइन निर्माण सन् २०२२ मेसम्म सम्पन्न गर्ने लक्ष्य राखिएकोमा कोभिड-१९ को महामारी र वन क्षेत्रमा रुख कटानको स्वीकृति वन मन्त्रालयबाट प्राप्त हुन ढिलाइ हुँदा सम्झौताको म्याद सन् २०२४ डिसेम्बर १९ सम्म थप गरिएको छ। आयोजनाबाट विद्युत उत्पादनको पहिलो १० वर्षसम्म वार्षिक औषत विद्युत उत्पादन ५८ करोड ७७ लाख, त्यसपछि ४८ करोड ९९ लाख युनिट उत्पादन हुने आयोजनाले जनाएको छ।

(गोरखापत्र बाट )

तपाईंको प्रतिकृया