शनिबार, फागुन २०, २०७९

सर्वोच्च अदालतले प्रधानमन्त्री पुष्पकमल दाहाल प्रचण्ड विरुद्ध सर्वोच्च अदालतमा पेस भएको रिट निवेदन दर्ता गर्न आदेश दिएको छ ।

पहिले पनि छानबिन र कारबाही हुनुपर्ने आदेश माग गर्दै सर्वोच्चमा रिट परेकोमा अदालत प्रशासनले राजनीतिक प्रकृतिको अभिव्यक्तिमा टेकेर पेस भएको निवेदन दर्ता हुन नसक्ने भन्दै दरपिठ (दर्ता नहुने) आदेश गरेको थियो l

२०७६ माघ १ गते माघीको अवसरमा प्रचण्डले द्वन्द्व कालमा मारिएका ५ हजारको मात्र आफूले जिम्मा लिने अभिव्यक्ति दिएका थिए र उक्त भनाइलाई आधार मानी अधिवक्ता ज्ञानेन्द्रराज आरण, कल्याण बुढाथोकी लगायत प्रचण्डमाथि फौजदारी अभियोगमा छानबिन र कारबाही हुनुपर्ने आदेश माग गर्दै सर्वोच्चमा रिट दिएका थिए ।

‘मान्छे मारे भन्ने छुट कसैलाई छैन । ‘व्यक्ति हत्या मैले नै गरेको हुँ भनेर कानुनलाई चुनौती दिँदा पीडित पक्षलाई चोट पर्नु स्वाभाविक हुन्छ । प्रचण्डले २०७६ माघ १ मा गरेको हत्यामा आफ्नो संलग्नता स्वीकारोक्ति, हुँकार, कानुन हातमा लिएर दिएको सार्वजनिक अभिव्यक्ति, ५ हजार व्यक्ति मारेको भन्ने साविति बयान गैरकानुनी भएकोले निजलाई तत्काल पक्राउ गरी सजाय गर्नुपर्ने देखिन्छ,’ निवेदनमा भनिएको छ ।

तर, उक्त भनाइलाई बदर गर्दै शुक्रबार सर्वोच्चले निवेदकको सुनुवाई गर्न आदेश दिएको हो ।

यो सँगै अब प्रचण्डविरुद्धको निवेदन आइतबार नै सवोच्चमा दर्ता हुने जनाइएको छ ।