खेलाडीलाई जनही १ लाख दिने क्यानको घोषणा

बिहीबार, फागुन १८, २०७९ ll बिहीबार युएईमा भएको निर्णायक खेलमा घरेलु टोली युएई माथि ७ रनको रोमाञ्चक जित निकाल्दै नेपाल आगामी वर्ष श्रीलंकामा हुने युवा विश्वकपमा छानिएको हो।

युएईको अजमानस्थित इडेन गार्डेन ओभलमा नेपालले दिएको १९२ रनको लक्ष्य पछ्याएको युएई अन्तिम १२ बल अगाडि नै १८४ रनमा अलआउट भएको थियो।

दीपेश कँडेलले अन्तिम ३ विकेट लिँदै ह्याट्रिक पूरा गर्दा अविस्मरणीय रूपमा नेपाललाई विश्वकपमा पुर्‍याएका हुन्।नेपाललाई नाटकीय जित दिलाउन स्पिनर दीपेशले ह्याटिकसहित पाँच विकेट लिए।

नेपालले पछिल्लो पटक २०१६ मा बंगलादेशमा भएको विश्वकप खेलेको थियो। त्यसपछि नेपालले यू१९ विश्वकप खेल्न सकेको थिएन। यसअघि सन् २०१८ मा नेपाल युएईसँग नै वर्षाले प्रभावित खेलमा डकवर्थ लुइस नियमको आधारमा एक रनले पराजित हुँदै विश्वकपमा पुग्न चुकेको थियो। त्यही एक रनको कारण २०२० मात्रै होइन, २०२२ को पनि विश्वकप खेल्न पाएन।

नेपाल विश्वकपमा पुगेको अवसरमा प्रधानमन्त्री पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओलीलगातय नेताहरूले बधाइ र शुभकामना दिएका छन्।

विश्वकपमा छनोट भएको नेपाली टिमका हरेक सदस्यलाई क्रिकेट एसोसिएसन अफ नेपाल (क्यान) ले एक-एक लाख रूपैयाँ पुरस्कार दिने भएको छ।