इन्सुलिनको मूल्य ७० प्रतिशतले घटाएको अमेरिकी औषधि निर्माता एली लिलीको दाबी

अमेरिकी औषधि निर्माता एली लिलीले इन्सुलिनको मूल्य ७० प्रतिशतले घटाएको दाबी गरेको छ ।

एली लिलीले मधुमेहका लाखौं अमेरिकी बिरामीलाई असर गर्ने गरी वर्षौंदेखिको बढ्दो मूल्यपछि इन्सुलिनको मूल्यमा ७० प्रतिशतले कटौती गर्ने घोषणा गरेको हो ।

हालैका वर्षहरूमा इन्सुलिनको लागत बढेको र मागमा पनि उल्लेखनीय वृद्धि भएको सन्दर्भमा यो घोषणा गरिएको हो ।

एली लिलीले जारी गरेको विज्ञप्तिमा भनिएको छ, “लिलीले लिलीइन्सुलिनमा पहुँच प्राप्त गर्न सजिलो होस् र जटिल स्वास्थ्य सेवा प्रणालीलाई नेभिगेट गर्न कठिनाइ हुन सक्ने अमेरिकीहरूलाई मद्दत गर्न यी कदमहरू चालिरहेको छ ।”

कम्पनीले मे १ देखि आफ्नो ब्रान्डेड इन्सुलिनको मूल्य प्रति भायल २५ डलरमा झार्ने घोषणा गरेको छ ।

लिलीका प्रमुख कार्यकारी अधिकृत डेभिड रिक्सले भने, “हालको स्वास्थ्य सेवा प्रणालीले मधुमेह भएका अधिकांश व्यक्तिका लागि इन्सुलिनको पहुँच प्रदान गर्दछ, तर यसले अझै पनि सबैका लागि किफायती इन्सुलिन प्रदान गर्दैन र यसलाई परिवर्तन गर्न आवश्यक छ ।”

सन् २०२२ मा गरिएको एक अध्ययनअनुसार मधुमेह विश्वव्यापी रूपमा तीव्र गतिमा बढिरहेको दीर्घकालीन रोगमध्ये एक हो । (रासस/एएफपी)

तपाईंको प्रतिकृया