शुक्रबार,१२ फागुन २०७९ ll नेपालले संयुक्त अरब इमिरेट्समा (युएई)मा जारी आईसीसी यू–१९ पुरुष विश्वकप क्रिकेट एसिया छनोट प्रतियोगितामा विजयी सुरुवात गरेको छ ।

ईडन ग्राडेन ओभल अजमान मैदानमा शुक्रबार भएको खेलमा नेपालले सिंगापुरलाई ९६ रनले हरायो । नेपालले दिएको दुई सय ६२ रनको विजयी लक्ष्यसहित जवाफी ब्याटिङ गरेको सिंगापुरले ५० ओभरमा सात विकेटको क्षतिमा एक सय ६५ रनमा समेटिएको थियो ।

सिंगापुरका लागि आर्यन मोदीले ५८ रन बनाए । सिद्धान्त श्रीकान्तले ४४, अर्जुन नागपल र अवुद्ध चाजेरले १४/१४ रन बनाए । बलिङ्गमा नेपालका हेमन्त धामी र सुवास भण्डारी दुई दुई तथा विशाल बिक्रम केसीले एक विकेट लिए।

यसअघि टस जितेर पहिले ब्याटिङ गरेको नेपालले ५० ओभरमा सात विकेटको क्षतिमा २६१ रनको सम्मानजनक स्कोर बनाएको थियो । नेपालका लागि आकाश त्रिपाटीले ७८ रन बनाए । विशाल विक्रम केसीले ६३,अर्जुन कुमाल ३७,कप्तान देव खनालले २१, दिपक बोहोराले १७,सुवास भण्डारीले अविजित १२ र दिपक डुम्रेले १० रन बनाए ।

बलिङमा सिंगापुरका लागि आर्यभार चौधरी र अभ्युदय छन्जिरले दुई दुई विकेट लिए । छनोट प्रतियोगितामा आयोजक यूएई, नेपाल, सिंगापुर, कुबेत, हङकङ र मलेसियाको सहभागिता रहेको छ ।

नेपालले दोस्रो खेल शनिबार कुवेतसँग खेल्नेछ । राउण्ड रोविन लिगका आधारमा सञ्चालित प्रतियोगिताको शीर्षटोली सन् २०२४ मा श्रीलंकामा हुने विश्वकपमा छनोट हुनेछ ।

(गोरखापत्र,१२ फागुन २०७९, शुक्रबार)