शुक्रबार,१२ फागुन २०७९ ll विश्व समुदायको चेतावनी तथा सुझावलाई नजरअन्दाज गर्दै र “डि-नाजीफाइ” को नाम दिएर रुसले युक्रेन माथि गरेको बर्बरतापूर्ण युद्ध पनि एक वर्ष पुगेछ l २०२२ को फेब्रुअरी २४ मा रुसी राष्ट्रपति भ्लादिमिर पुटिनले युक्रेनमा आक्रमण सुरु गरेका थिए ।

यसै बीच संयुक्त राष्ट्र संघको महासभाले युक्रेनमाथि रुसले गर्दै आएको आक्रमण रोक्नुपर्ने प्रस्ताव अत्यधिक मतले पारित गरेको छ । यो प्रस्तावको पक्षमा नेपालसहित १४१ देशले मत दिए । रुस, बेलारुस, उत्तर कोरिया, सिरिया, माली, इरिट्रिया र निकारागुआले भने प्रस्तावको विपक्षमा मतदान गरे । चीन, भारत, इरान, दक्षिण अफ्रिका लगायतका ३२ देश भने तटस्थ बसेका थिए ।

संयुक्त राष्ट्रसंघको महासभाले युक्रेनमाथि रुसले गरेको आक्रमणको भर्त्सना गरेको छ । महासभाले लडाइँ रोकेर विनाशर्त युक्रेनबाट रुसी सेना फिर्ता गर्नुपर्ने र सक्दो चाँडो शान्ति कायम गर्नुपर्ने प्रस्तावलाई अत्यधिक मतका साथ पारित गरेको छ ।

युद्ध सुरुभए यता दुवै तर्फका सेनामा ठूलो क्षती भएको छ । रुसी आक्रमणबाट युक्रेनका थुप्रै सर्वसाधारण पनि मारिएको, कयौं मानिसहरु छिमेकी देशमा विस्तापित भएको र शहरहरु खण्डहरमा परिणत भएका मिडिया रिपोर्टहरु सार्वजनिक भएका छन् ।

रुस-युक्रेन युद्धको एक वर्षे कालखण्डमा दुवै देशले कम्तिमा ९ देखि १६ हजार हाराहारी सैनिक गुमाएको बताइन्छ । अमेरिकाले त हालसम्म सबैतर्फका दुई लाख हाराहारीको ज्यान गएको अनुमान गरेको छ ।

घटनाक्रमलाई मध्यनजर गर्दा जारी युद्धमा आणविक हतियारको समेत प्रयोग हुन सक्ने विश्व समुदायको चिन्ता छ ।