काठमाडौँ,फागुन १ ll म्यानचेस्टर युनाइटेडले आइतबार राति इंग्लिस प्रिमियर लिगमा लिड्स युनाइटेडलाई २–० ले हराएको छ । मार्कुस राशफोर्ड र वैकल्पिक खेलाडी एलेजान्द्रो गरान्चोले अन्तिम समयमा गरेको गोलको मद्दतले यो जित हात परेको हो l

इरिक टेन ह्यागको टिम युनाइटेडले गोलका लागि ८० मिनेटसम्म संघर्ष गर्नुपर्‍यो । ८०औँ मिनेटमा राशफोर्डले लुक शाको क्रसलाई हेडमार्फत गरेको गोलमा युनाइटेडले अग्रता लियो । जारी सिजन सबैखाले प्रतियोगितामा गरी राशफोर्डको २१औँ गोल हो ।

त्यसको पाँच बित्न नपाउँदै गरान्चोले अर्को गोल थपेपछि युनाइटेडले महत्त्वपूर्ण तीन अंक पक्का गर्‍यो । गरान्चो ६१औँ मिनेटमा जाडोन सान्चोको स्थानमा मैदानमा प्रवेश गरेका थिए ।

जितसँगै युनाइटेडले २३ खेलबाट ४६ अंक जोडेको छ । त्यो दोस्रो स्थानको म्यानचेस्टर सिटीभन्दा दुई अंकले पछाडि हो । चौथो स्थानको न्युक्यासल युनाइटेडभन्दा पाँच अंकले अगाडि हो । तर, युनाइटेडले एक खेल बढी खेलेको छ ।