काठमाडौं, माघ २७ || शुक्रबार सङ्घीय संसद्को संयुक्त बैठकलाई सम्बोधन गर्नुहुँदै राष्ट्रपति भण्डारीले अर्थतन्त्रको सुदृढीकरणका लागि गम्भीर पाइला चाल्नुपर्ने बताउनुभएको छ। उहाले देशको अर्थतन्त्र, श्रमबजार, उत्पादन क्षेत्र, पुँजीगत बजेट, वित्त नीति र मौद्रिक नीतिमा चासो दिनुका साथै सरकारले पर्यटकीय क्षेत्रको विकास, पूर्वाधार निर्माण, सेवाको उपलब्धताका लागि सहजीकरण, सेवा र गुणस्तरको अनुगमन, राष्ट्रिय र अन्तर्राष्ट्रिय रुपमा बजारीकरण र सहज पहुँचको व्यवस्थापन गर्नुपर्नेमा जोड दिनुभयो । 

देशको अर्थतन्त्रप्रति चिन्ता व्यक्त गर्दै राष्ट्रपति भण्डारीले भन्नुभयो, ‘‘कोभिड-१९ का कारण विश्व अर्थतन्त्रमा परेको प्रभावबाट नेपाल मात्र अछुतो रहको छैन। अर्थतन्त्रको सुदृढीकरणका लागि हामीले गम्भीर पाइला चाल्नुपर्ने देखिएको छ। औपचारिक अर्थतन्त्रलाई प्रवर्द्धन गर्न र संस्थागत गर्न वित्त नीतिमा निर्देशित हुनुपर्ने देखिएको छ।’’ 

देशको अर्थतन्त्रको विषयमा सबै जानकार रहेको बताउनुहुँदै उहाले भन्नुभयो ‘‘देशको अर्थतन्त्रको विषयमा हामी सबै जानकार छौँ। अर्थतन्त्रमा देखिएका समस्याको अल्पकालीन र दीर्घकालीन समाधान खोज्नुपर्ने अवस्था छ। अर्थतन्त्रका सूचकमा तत्काल केही सुधार देखिए पनि त्यो भरपर्दो छैन।’’

व्यापार घाटाको बारेमा राष्ट्रपति भण्डारीले भन्नुभयो ‘‘बढ्दै गएको व्यापार घाटालाई कम गर्न उत्पादन क्षेत्रमा हामी सबै गम्भीर बन्नुपर्छ। विश्वव्यापीकरणको यो युगमा हाम्रो प्रयास मात्र पर्याप्त हुँदैन। कोभिड–१९ र डेंगुलाई देखाएर पन्छिने अवस्था छैन।’’ 

राष्ट्रपति भण्डारीले पुँजीगत बजेट कम हुने र त्यो सबै खर्च हुन नसक्दा पुँजी निर्माणमा समस्या भएको बताउनुभएको छ। पछिल्लो समय लक्ष्यअनुसारको राजस्व सङ्कलन हुन नसकेकोप्रति उहाँले चासो व्यक्त गर्नुभएको छ। लक्ष्य अनुसार राजस्व सङ्कलन हुन नसक्दा देशको आर्थिक वृद्धिमा असर परिरहेको उहाँको भनाइ छ।  लक्ष्य अनुसारको राजस्व सङ्कलनमा सरकारले आवश्यक कदम चाल्नुपर्ने उहाँले बताउनुभयो । राजस्व सङ्कलन कम हुनु र वैदेशिक सहायता परिचालनमा कमी आउँदा आन्तरिक ऋणको चाप बढ्दै गएको उहाँको भनाइ छ।

सम्बोधनका क्रममा उहाँले भन्नुभयो, “निर्यात प्रवर्द्धनको लागि आन्तरिक उत्पादनको क्षेत्र सबल हुनु जरुरी छ। सरकारले उत्पदान वृद्धिका लागि छिटोभन्दा छिटो समन्वयात्मक भूमिका निर्वाह गर्नुपर्ने आवश्यकता  छ।”