काठमाडौं, २६ माघ २०७९ || भोलि शुक्रबार राष्ट्र बैंकले मौद्रिक नीतिको अर्धवार्षिक समीक्षा सार्वजनिक गर्ने तयारी गरिरहेको र राष्ट्र बैंकले अहिले कायम नीतिगत दर नचलाउने संकेत गरेको छ। 

राष्ट्र बैंकका एक कार्यकारी निर्देशक अनुसार अहिले आयात घटेको छ, रेमिटेन्स आप्रवाह बढेको छ र आयात पनि उच्च दरमा नहुने हो भने रेमिटेन्स बढ्दै जाँदा बजारमा आफैं तरलता बढ्न थाल्छ, ब्याजदर समेत घट्दै जान्छ तेसैले राष्ट्र बैंकले नीतिगत दर नचलाउने कुरामा संकेत गरे ।

हाल वाणिज्य बैंकहरूसँग दुई खर्ब हाराहारी कर्जा लगानी योग्य पुँजी रहेपनि उनीहरू अलि सचेत भइरहेकोले बजारमा पैसाको प्रवाह नै रोकिएको र पैसाको प्रवाह रोकिदा सबैभन्दा धेरै समस्यामा साना व्यवसायीहरू परेको छ ।

व्यवसायी शेखर गोल्छा भन्छन् ‘ठूला बैंकबाट कर्जा लिने व्यवसायीको संख्या १७/१८ लाख मात्रै छ, जबकी लघुवित्त र सहकारीहरूका ऋणी ४०/५० लाखको हाराहारीमा छन्, तर पैसाको प्रवाह रोकिदा सबैभन्दा बढी समस्या साना व्यवसायीलाई परिरहेको छ।’

लगानीकर्ताहरू भने सेयर बजार सम्बन्धमा राष्ट्र बैंकले नीतिमा केही लचिलो हुने अपेक्षामा छन्। 

उनीहरूले एउटा ग्राहकले अधिकतम १२ करोड रूपैयाँसम्म मात्र कर्जा लिन सक्ने व्यवस्थामा संशोधन हुने, बैंकहरूले सेयर धितोमा गरेको कर्जा लगानीको लागि राखिने जोखिम प्रावधान घटाइने अपेक्षा समेत गर्दै आएका छन्। 

सेयर धितोमा जारी भएको दुई करोड ५० लाखसम्मको यस्तो कर्जालाई सय प्रतिशत बराबर जोखिम मानेर प्रावधान राख्नु पर्ने र दुई करोड ५० लाखभन्दा माथि भए एक सय ५० प्रतिशतसम्म प्रावधान राख्न पर्ने व्यवस्था छ।