युएसएआईडी की प्रमुख सामन्था पावर आज साथै अर्की उच्च तहकी अमेरिकी कूटनीतिज्ञ पनि नेपाल आउँदै

US Deputy Assistant Secretary Afrin Akter

२०७९ माघ २४ । आगामी फेब्रुअरी १४ (फागुन २) मा अमेरिकाकी डेपुटी असिस्टेन्ट सेक्रेटरी अफ स्टेट अफ्रिन अख्तर नेपाल आउँदै छिन् । उनी दुई दिने भ्रमणका लागि काठमाडौंमा हुनेछिन् । उच्च तहको स्रोतका अनुसार उनको भ्रमण कूटनीति र सार्वजनिक क्षेत्र तथा विकास सहायता परियोजनाकै बारेमा हुने छ ।

यो सहित संयुक्त राज्य अमेरिकाबाट नेपालमा तीन सातामा तीन महत्वपूर्ण भ्रमण हुँदैछन् र रमाईलो कुरा नेपालमा महिला परराष्ट्रमन्त्री नियुक्त भएयताका यी तीन उच्च तहका अमेरिकी भ्रमण नेतृत्वकर्ता सबै महिला नै छन्।

युएसएआईडी की प्रमुख सामन्था पावर दुई दिने भ्रमणमा आज नेपाल आईपुग्ने छिन् । सन् २००२ मा तत्कालीन अमेरिकी विदेशमन्त्री कोलिन पावलको भ्रमणपछिकै यो उच्च तहको भ्रमण हो । सामन्था अमेरिकाको क्याबिनेट तहकी अधिकारीमात्रै नभई त्यहाँको राष्ट्रिय सुरक्षा परिषद्की सदस्य समेत हुन् । त्यस अर्थमा यो आसन्न भ्रमणलाई उच्च महत्वका साथ हेरिएको छ ।

कूटनीतिक स्रोतका अनुसार यो नियमित किसिमको भ्रमण हो । तर पछिल्ला वर्षमा एमसीसी, इन्डो प्यासिफिक स्ट्र्याटेजी लगायतका मुद्दाले नेपालका नागरिकहरुमा विभिन्न किसिमका तरंगहरु उत्पन्न गरेका छन् । चीनले बीआरआई अघि बढाएसँगै यहाँ भूराजनीतिक टक्कर हुन सक्ने आकलन चलिरहेका बेला सामन्थाको भ्रमण भएको हो ।

युएसएआईडीले वक्तव्यमा सामन्थाको भ्रमणलाई ७५ वर्षयताको अमेरिका–नेपालका सरकार तथा जनताबीचको सम्बन्धलाई अझै बढाउनका लागि गरिन लागेको प्रयास भनी अर्थ्याएको छ । ‘उहाँले नेपाल र यहाँ गठन भएको नयाँ सरकारसँगको सम्बन्धलाई हार्दिक बनाउँदै अमेरिकी सहयोग प्रतिबद्धताबारे जोड दिनुहुनेछ ।’

सामन्था आउने तयारीका लागि भर्खरै अमेरिकी राजनीतिक मामिलासम्बन्धी उपमन्त्री भिक्टोरिया नुल्यान्ड नेपाल आएर फर्केकी थिइन् । त्यसअघि मानवअधिकार मामिलासम्बन्धी उपमन्त्री उज्रा जियासमेत गत जेठमा आएर फर्केकी थिइन् ।

तपाईंको प्रतिकृया