काठमाडौं, माघ २० ॥ मलेसियाका गृह मन्त्री सैफुदिन नासुसन तीन दिने नेपाल भ्रमणका क्रममा बिहीबार साँझ काठमाडौं आएपुगेका छन् र आजबाट उच्चस्तरीय भेटघाट गर्ने भएका छन्।

आज उनले प्रधानमन्त्री पुष्पकमल दाहाल, राष्ट्रपति विद्यादेवी भण्डारी, श्रम, रोजगार तथा सामाजिक सुरक्षामन्त्री डोलप्रसाद अर्याल लगायतलाई भेट्ने कार्यक्रम छ। खासगरि मलेसियाको ‘फरेन वर्कर इम्प्लोइमेन्ट रिल्याक्सेशन प्लान’ [ Foreign Worker Employment Relaxation Plan] बारे गृहमन्त्री इस्माइलले नेपाली अधिकारीसँग छलफल गर्ने बताइएको छ।

आज १० बजे सोल्टी होटेलमा श्रम, रोजगार तथा सामाजिक सुरक्षामन्त्री डोलप्रसाद अर्यालसँग औपचारिक हुने भेटवार्तामा श्रम सम्झौता कार्यान्वयनलगायतका महत्त्वपूर्ण विषयमा छलफल हुने मन्त्रालयका सहसचिव एवं प्रवक्ता डण्डुराज घिमिरेले जानकारी दिए। हिंजो काठमाडौं ओर्लिएपछि पत्रकारहरुसँग संक्षिप्त प्रतिक्रिया दिँदै उनले नेपाल भ्रमणको एउटा उद्देश्यमात्र रहेको बताए। त्यो हो – नेपालबाट जनशक्ति मेलसिया लैजाने प्रक्रियाबारे नेपाल सरकारसँग वार्ता।

सैफुदिनले मेलेसियाका ५ वटा रणनैतिक औद्योगिक क्षेत्रका लागि नेपाली जनशक्ति निकै महत्वपूर्ण रहेको समेत बताएका छन्। नेपाल भ्रमण सकेर उनी शनिबार बंगलादेश प्रस्थान गर्नेछन्।