काठमाडौं २ बाट प्रतिनिधिसभामा स्वतन्त्र उम्मेदवारी दिएका कोषराज सुवेदी मत माग्न निमन्त्रणापत्र लिएर घरदैलो गरिरहेका छन् ।

लौरो चुनाव चिन्ह लिएर चुनावी मैदानमा उत्रेका सुवेदीको प्रतिस्पर्धा गठबन्धनका उमेदवार र एमालेका उमेदवार सँग हुँदैछ । यो क्षेत्र मा गठबन्धनका उमेदवार ओनसरी घर्ती र एमालेका मणिराम फुयाल सहित अन्य २० जना भन्दा धेरै उम्मेदवार मैदानमा छन् । सुवेदी यी सबैलाई पछि पार्दै जित निकाल्नेमा आशावादी छन् ।
उनले जनतालाई आफ्नो पक्षमा मतदान गर्न निमन्त्रणापत्र बाँड्ने योजना बनाएका हुन् । ‘म अलिकति फरक काम गर्छु, अरु नेता घोषणापत्र लिएर जान्छन् म निमन्त्रणापत्र’ उनले भने ‘निमन्त्रणापत्रमा केही खालि ठाउँ छोडिएको हुन्छ, जसमा मतदाताले आफ्नो कुरा लेख्नुहुन्छ र निर्वाचन जितेपछि म त्यसलाई घोषणापत्र बनाउँछु ।’ उनले जितेपछिमात्र घोषणापत्र बनाउने जनाएका छन् । निकै लामो समयदेखि यो क्षेत्रमा उठ्ने तयारी गरेका उनले जनताको समस्या के छ भन्ने आफूले बुझेको बताएका छन् । जनताको समस्या आफ्नै समस्या भएको ठान्ने उनी जनताले नयाँ परीक्षा चाहेकाले आफू परीक्षण हुन चाहेको जनाएका छन् । हिजोसम्म राजनीति गर्नेहरुले सधैं जनताका नाममा राजनीति गरेको तर जनताको जीवनस्तरमा सुधार ल्याउन नसकेको बताएका छन् । ‘म अभियान लिएर गाउँमा जाँदा नागरिकहरु उत्साहित हुनुभएको छ, मैले आफ्ना कुरा राखेपछि उहाँहरु विश्वस्त हुनुभएको छ’ उनले भने ‘म उम्मेदवार हुँ, अरु पार्टीका पनि उम्मेदवार हुनुहुन्छ, को को उम्मेदवार भन्नेतिर मैले ध्यान दिएको छैन, कसरी जनताको मन जितेर निर्वाचन जित्ने र जनतालाई न्याय दिने त्यहीमात्र मेरो उद्येश्य हो ।’
उनले नयाँनयाँ कार्यक्रम घोषणा गरेका छन् । आफू किसानको छोरो भएकाले किसानका कुरालाई उनले प्राथमिकतामा राखेका छन् । कृषिबाट क्रान्ति गर्न सकिन्छ भन्ने उनी थप्छन् ‘हाम्रो देशमा जहाँ जेमा पनि सम्भावना छ तर अहिलेसम्म शासन गरेकाले त्यसलाई बुझ्न सकेनन् त्यसैले म र हामीजस्ताको खाँचो छ अहिले ।’ कृषिको समृद्धिबाट देश विकास सम्भव छ भन्ने उनी आर्थिक क्षेत्रमा देखिएको नीतिगत भ्रष्टाचारको विरुद्धमा बोल्दै आएका छन् । एक प्रतिष्ठित वित्तीय संस्थाको नायव प्रमुख कार्यकारी अधिकृतसमेत भइसकेका उनी डिजिटल नेपाल बनाउने लक्ष्य लिएर अघि बढेका छन् । ‘अर्थतन्त्रभित्र देखिएका धमिराहरुको अन्त्य गर्नु छ, सदनमा सधैं जनताका आवाज उठाउँछु’ उनले भने ‘मेरा धेरै योजना छन्, ती मध्ये मुख्यतः सोचसँग समृद्धि, समुन्नत लोकतन्त्र, दीगो पूर्वाधार, आर्थिक पारदर्शिता , गुरूकुल र गुगल फ्यूजन सहितको शिक्षा, निशुल्क स्वास्थ बीमा सेवा लगायतका एजेण्डा बनाएका छन् ।
‘मसँग छुट्टै भिजन छ जसले देश बनाउँछ र जनतालाई न्याया दिन्छ त्यसैले पनि म जनप्रतिनिधि हुनुपर्छ’ उनले भने ‘ दलहरुले हिजोको जस्तो गाना गाएर हुँदैन, अहिलेसम्म उनीहरुले देशलाई कुन अवस्थामा पु¥याए भन्ने जनताले राम्रो बुझेका छन् त्यसैले म नै सबैको साझा उम्मेदवार हुँ ।
उनले जनताको आवाज सदनसम्म पुर्‍याउ र नीतिगत परिवर्तन गरी ब्यवस्थित प्रणाली बसाउने अठोटका साथ मङ्सिर ४ मा हुने प्रतिनिधिसभा सदस्य निर्वाचनमा काठमाडौं क्षेत्र नम्बर २ बाट स्वतन्त्र उम्मेद्बारी घोषणा गरि चुनावी गतिविधिलाई तिव्र पारेका छन् ।