धेरै ढले ढल्दै छन्
हिजो अचनाक हुरी चल्यो,
धेरै बिरुवाहरू ढले,
मकै ढले, बाँस ढले
रुखहरू ढले, के के ढले ढले
कोरोनको हुरी चल्यो
धेरै प्रियहरू ढले, पास्टर ढले, बिस्वासी ढले,
पुजाहारी ढले, जन्ती ढले, दुलाहा ढले, दुलही ढले
वकिल ढले, नर्स ढले, डाक्टर ढले, रोगि ढले, निरोगी पनि ढले
लामो समय भयो राजनीतिक लालचको हुरी चलेको
धेरै ढले, राजा ढले, राजपरिवार ढले, राज संस्था ढले,
सरकार ढले, पार्टी ढले,
नेताका असल चरित्र ढले,
तर एउटा अनौठो भो, अति अनौठो कुरो
उनीहरूको शक्ति र अधिकार प्रति लालायित
लोभी चरित्र भने झन् अग्लो गरि खडा भयो
जति अस्थिरता, जति आँधी बेहरी राजनीतिक गतिविधि
त्यत्ति नै लोभ र लालचले अधिकारको निक्ति
सबै ढलेर पनि नेताको पापी लोभी चरित्र ठडियो
देशको सिंगो जनस्वास्थ्यको बिकराल रूपमा पनि,
जुन बेला राज्य र अगुवा स्थिर हुनु पर्ने,
देश र जनताको स्वास्थ्यको निम्ति भएपनि एक साथ खडा हुनुपर्ने
तर शक्ति र अधिकार को लालचको हुरीले नेताहरू का असल चरित्रहरू ढले
केवल ठडियो त
नग्न अवस्थामा,
पद, अधिकार र सत्ताको
लोभी, लालची चरित्र

ढलेको शरीर, मरेको शरीर, जल्छ, त्यो चितामा
मलामीको इच्छामा त्यो लम्पसार बनि, सबैको बिदा स्विकारेर
तर चरित्र ढलेको मानिसको
नग्न स्वरूप, त्यो कुरूप, कुनै लाज बिना झन् शिर ठाडो गरि,
भौंतारिरहेका छन् शिंहदरबार तिर, ठुला निवास तिर, सर्बोच्च अदालात तिर
घुमीरहन्छ, डुली रहन्छ, अनि फेरी भोलि जनताको अघि
भोट माग्दै, प्रर्चार गर्दै हिंडछ,
नैतिक रूपमा पतित,
इथिक्स नभएको,
लाज नभएको
उसको हृदयमा कसैको राज नभएको
छाडा, जे मन लग्यो त्यहि गर्ने,
दर्शन हिन, दिशा हिन,
जसमाथि कसैको कुनै आश नभएको
यस्ता नग्न, निर्बस्त्र र निर्लज्जको पछी लाग्ने
आँखा छर्लङ्गै देख्ने अन्धा ,
आँखा भएका दृस्टीबिहिन हामी,
त्यस्तैको पछी लागि कुर्लंदै भन्छम्,
यसो दुनो सोजिने भए, जिन्दावाद
नत्र मुर्दावाद
क्षणिक इच्छा, स्वार्थ र भ्रमले
गर्दैन फाइदा न आज न भोलि

भो यो त अति भयो
ढल्न त दिन भएन नि भबिष्यको आशालाई
निरास बनाउनत भएन नि अब आउने पुस्तालाई
आजको, भोलिको, अनि पछीसम्मको हाम्रा सन्ततिहरूको
निम्ति भए पनि
नैतिक, इथिकल ग्राउण्डको धरातलमा रहेर
असल दर्शन बोकी, देश र जनताको निम्ती
स्वच्छ, निस्वार्थ, र असल सेवक पन भएको
असल नेता, असल सेवक
छिटै पाओस यो देशले
जस्तै हुरी चलेपनि नढलोस
उसको चरित्र,
स्थिर रहोस
उसको दर्शन
खडा रहोस उसको सम्मान
जनताको दिल दिलमा

लेखक: पौलस पाण्डे