नेपाल मदिनी मस्जिदमा गरिएको तोडफोडबारे अन्तरधार्मिक शान्ति महासंघको प्रेस विज्ञप्ति

कार्तिक ०९, आइतवार

काठमाडाैं ।

काठमाडौं सुन्धारा स्थित नेपाल मदिनी मस्जिदमा गरिएको तोडफोड र जग्गामाथि गरिएको अतिक्रमणको भर्त्सना गर्दै अन्तरधार्मिक शान्ति महासंघले प्रेस विज्ञप्ति निकालेको छ ।

“यस निन्दनीय घटनाको कडा भर्त्सना गर्दै, यस कार्यमा संलग्न जो कोही भए तापनि शिघ्रातिशिघ्र सत्य तथ्य पत्ता लगाई दोषीलाई कडाभन्दा कडा कारबाही गरी सार्वजनिक जानकारीमा ल्याउन यस अन्तरधार्मिक शान्ति महासंघ नेपाल सरकारलाई अनुरोध गर्दछ”, महासंघका महासचिव डा. महेन्द्र भट्टराईद्वा हस्ताक्षरित उक्त विज्ञप्तिमा भनिएको छ ।

पढ्नुहोस् विज्ञप्तिको पूर्ण पाठः

मितिः२०७७-०७-०९

प्रेस विज्ञप्ति
काठमाडौंको सुन्धारा स्थित धरहरा पछाडि रहेको नेपाल मदिनी मस्जिदमा कार्तिक ८, २०७७ शनिबार बिहान डोजर लगाई गरिएको तोडफोड् र क्षतिप्रति यस महासंघ गम्भीर आपत्ति र क्षोभ प्रकट गर्दछ । सय बर्षभन्दा अघि देखिनै भोग चलन गरिआएको अल्पसंख्यक नेपाली मुस्लिम समुदायको आराधना तथा सांस्कृतिक केन्द्रको रूपमा सम्मानित यो मस्जिदमा यसरी भएको हमला नियोजित ढंगमा गरिएको देखिन्छ । यो हाम्रो देशमा रहेको धार्मिक शान्ति एवं सहिष्णुतालाई खल्बल्याउने दुष्प्रयत्न हो ।

हाम्रो जस्तो बहुधार्मिक, बहुसांस्कृतिक, धर्मनिरपेक्ष राष्ट्र जहाँ अन्तरधार्मिक शान्ति र मिलापको लामो र गौरवमय इतिहास रहिआएको छ, कुनै पनि धार्मिक समुदायको आस्था तथा अभ्याससँग सम्बन्धित स्थल र भवनमाथि यसरी आक्रमण हुनु अति दुःखद अवस्था हो । यसकारण यस निन्दनीय घटनाको कडा भत्र्सना गर्दै, यस कार्यमा संलग्न जो कोही भए तापनि शिघ्रातिशिघ्र सत्य तथ्य पत्ता लगाई दोषीलाई कडाभन्दा कडा कारबाही गरी सार्वजनिक जानकारीमा ल्याउन यस अन्तरधार्मिक शान्ति महासंघ नेपाल सरकारलाई अनुरोध गर्दछ ।

– डा. महेन्द्र भट्टराई
महासचिव,
अन्तरधार्मिक शान्ति महासंघ नेपाल