लडाइँको श्रृङ्खलाबाट एक अंश–

–नारायण खडका

कस्तो लडाइँ होला यो
मैदानबाट भागेर
खोपीमा पसेर लड्नुपर्ने
जिन्दगीलाई ठप्प पारेर
पलेटी कसेर
घुँडा धसेर भिड्नुपर्ने ।

जिन्दगीमा
लडाईंको श्रृङ्खला
चलिरहने रहेछ
सबैलाई कहिं न कहिं
कुनै न कुनै मोडमा
कुनै न कुनै कारणले
लड्नु नै छ जिन्दगीमा ।
जिन्दगीको अर्को नाम
लडाईँ रहेछ
यसपालीको लडाईं
जसरी नि जित्नुछ ।

तर यो लडाइँ जितिसकेपछि
फेरि खोपीबाट खुरुरुरु दौडनुछ
बाँच्नको लागि
संघर्षका अरु लडाइँहरु
लडिरहनु छ जिन्दगीभरि ।
अनि लड्दालड्दै
एकदिन अन्तिम लडाइँ लड्नु छ
डङ्ग्रङ्गै लडेर थकाई मार्नुछ
यो मरणशील देहमा
फेरि कहिल्यै नउठ्ने गरी ।।

तपाईंको प्रतिकृया