पास्टर शेर ए.सी.

शुभ बिहानी !

काठमाडौं। २३ चैत। हामी सबै नेपाली दाजुभाइ, दिदीबहिनीहरू घरभित्र बसेको आज ठ्याक्कै १३ दिन भयो । अझै कति दिन यसरी बस्नुपर्ने हो, कसैलाई पनि थाहा छैन ? परमेश्वरसँग प्रार्थना गरौं, कोरोना भाइरसको प्रकोप र महामारी छिट्टै नियन्त्रणमा आओस् र हामी फेरि पुरानै अवस्था फर्कन सकौं ।

आज अप्रिल ५ तारिख । ग्रेगोरियन पात्रोअनुसार यसपालिको Palm Sunday अर्थात् खजुरको आइतवार आज नै हो । यो एउटा एकदमै महत्त्वपूर्ण दिन हो, जुन दिन प्रभु येसु आफ्नो मानवीय जीवनको अन्तिम हप्तामा हुनुहुन्थ्यो र एउटा गधाको बछेडोमा चढेर यरूशलेम प्रवेश गर्नुभएको थियो (मत्ती २१:१-१०) । उहाँ निस्तार चाडको ६ दिन अगाडि बेथानियामा आउनुभयो र बेलुकाको भोजन मार्थाको घरमा गर्नुभयो । भोलिपल्ट उहाँ यरूशलेम प्रवेश गर्नुभयो र उहाँ आउँदै हुनुहुन्छ भन्ने ठुलो भीडले सुन्यो र मानिसहरू खजुरका हाँगाहरू लिएर उहाँलाई स्वागत गर्न कराउँदै निस्के, “होसन्ना ! धन्य परमप्रभुको नाउँमा आउने इस्राएलका राजा !” (यूहन्ना १२:१-१३) ।
यसरी उहाँ एउटा विजयी राजा भएर यरूशलेम प्रवेश गर्नुभएको थियो । अनि मानिसहरूले खजुरका हाँगाहरू हातमा लिएर उहाँलाई स्वागत गरेका थिए । यही कारण यस दिनलाई खजुरको आइतवार भनिन्छ । आजबाट पवित्र हप्ता सुरु हुन्छ । आजको ५ दिनपछि असल शुक्रवार आउँछ । अर्को हप्ता आजकै दिन Easter Sunday अर्थात् पुनरुत्थान दिवस पर्छ, जसलाई हामी एक विजयी उत्सवको रूपमा मनाउँछौं । इतिहासमै पहिलो पटक हामी आआफ्नो घरमा बसेर असल शुक्रवार र पुनरुत्थान दिवस मनाउँदै छौं ।

सबैलाई यो खजुरको आइतवार, पवित्र हप्ता, असल शुक्रवार र पुनरुत्थान दिवसको धेरै धेरै शभकामना छ ।

पास्टर शेर ए.सी.
इमाडोल, ललितपुर नेपाल ।