कश्मीर मुद्दाबारे ट्रम्पले गरे मोदी र खानसँग कुराकानी

कश्मीर मुद्दाबारे ट्रम्पले गरे मोदी र इमरान खानसँग कुराकानी

‘परिस्थिति अप्ठ्यारो छ, तर कुराकानी राम्रो भयो : ट्रम्प

३ भदौ, काठमाडौं ।

अमेरिकी राष्ट्रपति डोनाल्ड ट्रम्पले जम्मू-कश्मीर मुद्दाबारे भारत र पाकिस्तानका प्रधानमन्त्रीसँग टेलिफोन वार्ता गरेका छन् । अमेरिकी राष्ट्रपति ट्रम्प, भारतीय प्रधानमन्त्री नरेन्द्र मोदी र पाकिस्तानी प्रधानमन्त्री इमरान खानबीच द्विपक्षीय र क्षेत्रीय मुद्दाबारे कुराकानी भएको हो ।

ट्रम्पले परिस्थिति अप्ठ्यारो भए पनि सकारात्मक कुराकानी भएको जानकारी ट्वीटरमार्फत् दिएका छन् । ट्रम्पले लेखेका छन्, ‘मेरा दुवै साथीहरु मोदी र खानसँग व्यापार, रणनीतिक साझेदारी तथा भारत र पाकिस्तानबीच काश्मीरमा देखिएको तनाव कम गर्नेबारे कुरा भयो । परिस्थिति अप्ठ्यारो छ, तर कुराकानी राम्रो छ ।’

सोमवार मोदीसँग टेलिफोन वार्ता लगत्तैपछि, ३० मिनेटपछि नै खानलाइ फोन गरेका ट्रम्पले उनलाइ भारतविरोधी अतिवादी भाषा शैलीका बारेमा सचेत गराएका थिए । उनले द्वन्द्व निवारण गर्न दुवै पक्षबाट संयम अपनाउनुपर्ने सुझाव पनि दिएका थिए ।