मैले फूलेको फूललाई हेरेर सोधेको छु। उसले मलाई हेरेर हाँस्न सिक भनेको छ। मैले त्यसरी नै हाँस्न सिकेको छु।मैले भुनभुनाउँदो भमरालाई हेरेर सोधेको छु। उसले मलाई हेरेर गुनगुनाउन सिक भनेको छ। मैले त्यसरी नै गुनगुनाउन सिकेको छु। मैले घरतरुलको मुन्टालाई भेटेर सोधेको छु। उसले आफू हलक्क बढेको देखेर कहिलेकाही शिर झुकाउनु पनि लाजमर्दो होइन भनेको छ। मैले त्यसरी नै शिर झुकाउन पनि सिकेको छु। मैले हावाको झोक्कालाई हेरेर सोधेको छु। उसले मलाई हेरेर फोहोर पतिङ्गरलाई कहिले कहीँ उडाउन सिक भनेको छ। मैले त्यसरी नै फोहर पतिङ्गर उडाउन पनि सिकेको छु। मैले दूध र पानीको घोलनलाई हेरेर सोधेको छु। उसले हामीलाई हेरेर मिल्न सिक भनेको छ। मैले त्यसरी नै घुलनमिलन हुन पनि सिकेको छु।

मैले पूर्वमा उदाउँदो सूर्यलाई हेरेर सोधेको छु। उसले मलाई हेरेर मान्छे जगाउन सिक भनेको छ। मैले त्यसरी नै मान्छे जागा गराउन पनि सिकेकोछु। मैले कोशी नदीको बगरमा छ्टपटाइ रहेको माछालाई हेरेर सोधेको छु। उसले मलाई हेरेर तिमी पनि देशको लागि म जस्तै छ्टपटाउन सिक भनेको छ। मैले त्यसरी नै देशका लागि छट्पटाउन सिकेको छु।मैले बलेको मैनवत्तीलाई हेरेर सोधेको छु। उसले मलाई हेरेरे अँंध्यारो हटाउन सिक भनेकोछ। त्यसरी नै मनकोअँध्यारो हटाउन सिकेको छु। मैले हिलो कुहुँदा रमाउने किसानलाई हेरेर जन्मजात सोधेको छु। उसले मलाई हेरेर श्रम र पसिनाको इतिहास मानव इतिहास भन्दा पुरानो भएको बुझ भनेकोछ। मैले पसिनाको अनमोल महत्व त्यसरी नै बुझेकोछु।

मैले घाम लागेर बिस्कुन सुक्दा खुशी हुने गृहिणी स्वयम् नेपालीआमाको काखमा बसेर सोधेको छु। उनले मलाई हेरेर सही ठाँउमा सही निर्णय लिन सिक भनेकी छन्। मैले आमाको वचन त्यसरी नै शिरोधार्य गरेकोछु। मैले नीलो आकाशलाई हेरेर सोधेको छु। उसले मलाई हेरेर गम्भीर हुन सिक भनेको छ। मैले त्यसरी नै जीवनमा गम्भीर हुन सिकेको छु। मैले एउटा रोगीघरलाई दिनहुँ भेटेर सोधेको छु। उसले मलाई हेरेर तिम्रो तनकाटेको पैसा मेरोलागि औषधी, डाक्टर र अस्पतालमा खर्च गर भनेको छ। मैले जीवनभर त्यसैगर्ने बाचा कसम खाएको छु।

यसरी प्रकृतिले मलाई सिकाउँदै छ। म सिक्दै छु। म नमरुन्जेल प्रकृतिसँग सिकिरहन्छु। प्रकृतिलाई गुरु मान्दा निक्कै मज्जा आउँछ। त्यसकारण प्रकृति शिक्षकका हामी विद्यार्थी हो रहेछौँ । धन्यवाद ।