म पढ्दै छु ! सरकार !!

म पढ्दै छु !सरकार !!
म पढ्दै छु!!!

सरकार!
म पढ्दै छु
शैक्षिकसत्रको
प्रारम्भिक दिनदेखि नै
डोको नाम्लो र
चिरपटका किताबहरू
म पढ्दै छु
१
चिप्लेटी ढुङ्गाका
डेस्कबेन्चमा ठिङ्ग उभिएर
आफ्नै भूगोलका
जीवनगति र पाठ्यक्रमहरू
म पढ्दै छु
खलियाघरको
पाठशालासम्म पुगेर
जीवनका प्रत्येक पानालाई
पल्टाइ पल्टाइ
म पढ्दै छु!

२
घाँस दाउरा र
गोठालाका कथाहरू
दिदीबहिनीहरुले पढेका
ढिकीजातो र पधेरोका पाठहरू
म पढ्दै छु!
दाजुभाइहरूले
दार्जीलिङ र सिक्किमतिर
कान्छा, कप्तान र नाम्ले भएर
भोगेका हेयका पाठहरू
म पढ्दै छु!
३
म नजन्मीकनै
मेरा बाउ र काकाहरूले
अरूले सुट्केस बोकेको देखेर
आफू विदेशिएपछि
आज जेलबाटै लेखेका
दुखका चिठीहरू
म पढ्दै छु!
४
जुन मैले पढ्दापढ्दै
समाचार सुनेँ
एफ एम रेडियाको
भोलुम ठूलोहुँदा
अनि म रोएँ धुरुधुरु
त्यसपछि आमा पनि हिँडिछन्
बाउ खोज्न शहरतिर
मोबाइल बोकेर
सायद भेट्छिन होला
बाउलाई एरपोर्टमा
जम्बो जेटले ल्याएको
क्याफिनभित्र
एक थान राहतका
चेकहरू सहित
ढुस्सी परेको चामललाई
हेलिकप्टरले बोकेर
गोदाममा सडाउने
त्यो खाद्यविज्ञान
म पढ्दै छु!
५
कतै भेटिन्छन् कि
मेरा बालअधिकारका
एकथान ठेलीहरू भनेर
धुइँपत्ताल खोज्दै
डोको नाम्लो र
हसियाका किताबहरू
म पढ्दै छु!
तर म पाउँदिन।
सायद हुन सक्छ
माइतीघर मण्डलातिर
कुर्लिंदै होलान्
या भित्तामा ब्यानर
लगाउने या नलगाउने विषयमा
राउन्ड टेबलको मिटिङमा
बहस चलाउँदै होलान् भनेर
म पढ्दै छु!
६
मेरो दुईछाक भात र
आङ ढाक्ने एकधरो लुगा
अर्थात् मेरो घरको
प्वाल परेको छानो टाल्ने
खै कहाँ गयो??
त्यो बाणिज्य शास्त्र भनेर
म पढ्दै छु!
खै कहाँ गयो??
ठूलीकान्छीले
काजीको खेतमा
जनबनी गर्दा चुहाएको
त्यो पसिनाको श्रमशास्त्र भनेर
म पढ्दै छु!
७
थापा काजीको
त्यो बटिया खेतमा
एकहल पानाका गोरू
आलीआली लगेर
उसिना चामलको कलौ खाँदै
हलो जोत्न सिकाउने
हाम्रो आधुनिक कृषि विज्ञान
म पढ्दैछु! सरकार !!
म पढ्दै छु!!

– लक्ष्मीप्रसाद कोइराला, इटहरी
(9842060076)

तपाईंको प्रतिकृया