म बिराेधी हाेईन

म विरोधी होईन
——————

– राजेन्द्र अधिकारी, लेकसाइड पाेखरा।

म विरोधी होईन।
मैले कसैको विरोध गरेको छैन।
मैले त आफ्नो हक़, अधिकार र स्वाधीनताको
वकालत मात्र गरेको हुँ।
मलाई हेक्का छ,
म आफुलाई प्रतिरक्षा गर्दा गर्दै,
अरू कसैलाई चोट पुर्याउन सक्छु।
त्यसैले म सजक छु।
मैले यति मात्र चाहेको हो कि,
म यो देशमा, यो देशकी नारीको कोखबाट जन्मिएं
र म यो देशको नागरिक भएको छु।
हो मेरो आमाको कोखमा मेरो वीजारोपण गर्ने
मेरो बुबा पनि यहि देशका नागरिक हुन्।
त्यसैले म संग यो देशको नागरिकता छ।
म यो देशको भाषा बोल्छु।
म यो देशको संविधान मान्छु।
यो देशको मुलुकी ऐन र न्याय क़ानून अनुशार चल्छु।
तर म अरू भन्दा फरक छु।
म अरू भन्दा फरक सोंच्छु।
किन भने म परिवर्तन भएको छु।
आफ्नो जीवनको मालिक म आफै हुँ।
अरूको विचार संग आफ्नो विचार मिल्नु पर्छ
भन्ने मान्यता राख्दिन म।
अरूले अंगीकार गरेको सिद्धान्त
अंगीकार गर्नु पर्छ भन्ने विचार मान्दिन म।
म स्वतन्त्र छु।
अरूलाई कुनै असर नपुर्याई आफु खुसी ज्युनु
मेरो अधिकार हो।
मेरो अधिकार म कसैलाई खोस्न दिने छैन।
मेरो स्वतन्त्रता कसैलाई हनन् गर्न दिने छैन।
बरू म मेरो ज्यानको बलिदान दिन तयार छु।
तर आफ्नो धार्मिकताबाट पछि हट्न सक्दिन।
म आफ्नो आश्थालाई त्याग्न सक्दिन।
मलाई मेरो अधिकार प्यारो छ।
मलाई मेरो स्वाधीनता प्यारो छ।
मलाई मेरो स्वतन्त्रता प्यारो छ।
र मलाई मेरो धार्मिकता प्यारो छ।