काठमाडौं- बैशाख ८, ईसाईहरूले देशभरी नै इस्टर सन्डे (येशू ख्रीष्‍टको पुनरूत्थान) महोत्सव २०७६ विभिन्न कार्यक्रम गरी चर्चहरूमा, खुल्ला मैदानमा, सभा भवनहरूमा प्रार्थना र प्रवचन गरी मनाएका छन्।
ईसाईहरूको ईश्वरशास्त्र (बाइबल) अनुसार, पृथ्वीको पहिलो मानिस आदम र हव्वाद्वारा पापले संसारका सबै मानिसमा प्रवेश गर्‍यो। संसारका मानिसको पापबाट मुक्ति दिन परमेश्वरले आफ्नो एकमात्र पुत्र येशू ख्रीष्‍टलाई संसारमा मानिसको रूपमा पठाउनुभयो। येशू ख्रीष्‍ट शुक्रबारका दिनमा क्रुसमा चढाइनुभयो, मारिनुभयो, चिहानमा गाडिनुभयो र तेस्रो दिन अर्थात आइतबार चिहानबाट पुनरूत्थान हुनुभयो। बाइबलको यही सत्यतालाई स्वीकार गरी येशू ख्रीष्‍टको नाउँमा विश्वास र ग्रहण गरेकाहरूले संसारभरी नै येशू ख्रीष्‍टको पुनरूत्थानलाई हर्षोउल्लासका साथ मनाउने गर्छन्।

नेपालमा पनि हरेक वर्ष येशू ख्रीष्‍टको पुनरूत्थान भएको दिन आइतबारलाई विशेष महत्व राखी ईष्‍टर सन्डे अर्थात पुनरूत्थान महोत्सव चर्चहरूमा, सार्वजनिक स्थलहरूमा शान्ति पद यात्रा गरी, प्रार्थना सभा गरी मनाउने गर्दै आएका छन्। यस वर्ष २०७६ मा नेपालका विभिन्न चर्चहरूमा जिल्ला, क्षेत्र अनुसार चर्चहरूले संयुक्त कार्यक्रम गरेका छन्।

यस वर्ष २०७६ सालमा काठमाडौं उपत्यकामात्रै ६ स्थानमा पुनरूत्थान महोत्सव भएका छन्। राजधानीको बढ्दो सवारी साधनको चापलाई असर नपरोस र पुनरूत्थान महोत्सवमा जान इच्छुक ईसाईहरू सजिलैसँग नजिकैको क्षेत्रमा सहभागि हुन सकून् भनी विभिन्न स्थानहरूमा येशू ख्रीष्‍टको पुनरूत्थान महोत्सव भएका छन्। विभिन्न चर्चहरूमा विहानको सूर्योदय प्रार्थना सेवा गरेर ७ बजेदेखि शान्ति पदयात्रा गरी सम्बन्धित क्षेत्रका खुल्ला मैदानमा भेला भई येशू ख्रीष्‍टको पुनरूत्थान महोत्सव मनाएका छन्।

उपत्यकाव्यापी ईष्‍टर महोत्सवका उपाध्यक्ष पास्टर पदम पराजुलीका अनुसार, ललितपुर जिल्लाको जावलाखेल, खोकना र गोदावरीमा पुनरुत्थान महोत्सव भएका छन्। भक्तपुर जिल्लाका चर्चहरूले पनि शान्ति पदयात्रा गरी खुल्ला मैदानमा संयूक्त रूपमा पुनरूत्थान सभा गरेका छन्। काठमाडौं जिल्लाका चर्चहरूले संयुक्त रूपमा छुट्टाछुट्टै स्थान थानकोट र सानो गौचरणमा पुनरूत्थान महोत्सव मनाएका छन्।

राष्ट्रिय ख्रीष्‍टियन महासंघ नेपालले पनि प्रज्ञा प्रतिष्ठानको भवन कमलादी काठमाडौंमा येशू ख्रीष्‍टको पुनरूत्थानको अवसर पारी माननीय शहरी विकास मन्त्री महोम्मद इश्तिहाक राईको प्रमुख अतिथ्यमा शुभकामना आदानप्रदान कार्यक्रम गरेको छ।
त्यसैगरी तनहुँ जिल्लामा तनहुँ ईसाई समाजको आयोजनामा दमौलीमा येशू ख्रीष्‍टको पुनरूत्थान महोत्सव २७६ सम्पन्न भएको छ। प्राप्त जानकारी अनुसार पास्टर ग्रीष्म पराजुलीले बाइबलबाट प्रवचन दिनुभएको थियो।