२०८३ असोज २७, मंगलवार

काठमाडौँ। लक्ष्मीश्री इन्भेस्टमेन्ट पब्लिक लिमिटेड कम्पनीको २१औँ वार्षिक साधारणसभा काठमाडौँमा भव्य रूपमा सम्पन्न भएको छ। कम्पनीका अध्यक्ष लक्ष्मीप्रसाद प्रसाईँको अध्यक्षतामा आयोजित उक्त सभाले पुँजी विस्तार, बोनस शेयर वितरण तथा सर्वसाधारणका लागि प्रारम्भिक सार्वजनिक निष्कासन (आईपीओ) जारी गर्ने लगायतका महत्त्वपूर्ण प्रस्तावहरू सर्वसम्मतिले पारित गरेको छ ।

​सभाले आर्थिक वर्ष २०८२/८३ को वार्षिक तथा वित्तीय विवरणहरू स्वीकृत गर्दै शेयरधनीहरूलाई ७ प्रतिशत बोनस शेयर वितरण गर्ने प्रस्ताव पारित गरेको छ र उक्त बोनस शेयरमा लाग्ने कर समेत कम्पनी आफैँले व्यहोर्ने निर्णय गरेको छ । दीर्घकालीन विकास रणनीतिलाई अघि बढाउँदै कम्पनीलाई प्राइभेट लिमिटेडबाट पब्लिक लिमिटेड कम्पनीमा रूपान्तरण गर्ने प्रस्ताव समेत साधारणसभाले अनुमोदन गरेको छ ।

​कम्पनीले आफ्नो चुक्ता पुँजी १ अर्ब रूपैयाँ पुर्‍याउने लक्ष्य लिएको छ । सोही लक्ष्य अनुरूप कुल चुक्ता पुँजीको २० प्रतिशत बराबर हुन आउने २० लाख कित्ता शेयर सर्वसाधारणका लागि (आईपीओ) निष्कासन गर्ने प्रक्रिया अघि बढाउने निर्णय भएको कम्पनीले जनाएको छ ।

​आगामी दिनमा लगानीको दायरा फराकिलो बनाउँदै जलविद्युत्, कृषि, आवास, उद्योग, हवाई उड्डयन, होटल तथा पर्यटन जस्ता उत्पादनमूलक र प्रतिफलमुखी क्षेत्रहरूमा लगानी विस्तार गर्ने रणनीति कम्पनीले सार्वजनिक गरेको छ । सभाका अध्यक्ष लक्ष्मीप्रसाद प्रसाईँले २१ वर्षे व्यावसायिक यात्रामा निरन्तर सहयोग पुर्‍याउने सम्पूर्ण सरोकारवालाहरूप्रति हार्दिक आभार व्यक्त गर्दै आगामी दिनमा संस्थालाई अझ सबल, पारदर्शी र प्रतिस्पर्धी बनाउँदै लैजाने प्रतिबद्धता व्यक्त गर्नुभयो ।