शनिबार, १७ असोज २०८३

​काठमाडौँ — विश्व बैंक समूहका अध्यक्ष अजय बाङ्गाको औपचारिक निमन्त्रणामा अर्थमन्त्री डा. स्वर्णिम वाग्ले नेतृत्वको नेपाली प्रतिनिधिमण्डल दुईदिने भ्रमणका लागि शुक्रबार राति अमेरिकाको राजधानी वासिङ्टन डीसीतर्फ प्रस्थान गरेको छ।

भ्रमणका क्रममा अक्टोबर ५ र ६ (असोज १९ र २० गते) अर्थमन्त्री वाग्लेले बहुपक्षीय वित्तीय संस्था तथा अमेरिकी सरकारका उच्चपदस्थ अधिकारीहरूसँग निर्णायक वार्ता गर्ने कार्यक्रम रहेको अर्थ मन्त्रालयका प्रवक्ता अमृत लम्सालले जानकारी दिएका छन्। ​भ्रमणका क्रममा अर्थमन्त्री वाग्लेले विश्व बैंक, अमेरिकी अर्थ मन्त्रालय र इन्टरनेसनल डेभलपमेन्ट फाइनान्स कर्पोरेसन (डीएफसी) का नेतृत्वका साथै अमेरिकी निजी क्षेत्रका अग्रणी लगानीकर्ताहरूसँग बेग्लै छलफल गर्नेछन्।

वार्तामा द्विपक्षीय सहायता अभिवृद्धि, बृहत् आर्थिक सुधार तथा नेपाललाई वित्तीय कारबाही कार्यदलको ‘ग्रे लिस्ट’बाट बाहिर निकाल्न भइरहेका प्रयासका विषयलाई प्राथमिकताका साथ उठाइने भएको छ। ​यसपटकको भ्रमणको अर्को महत्त्वपूर्ण पक्ष भोटेकोसी नदीमा आएको विनाशकारी बाढीपछि पुगेको भौतिक तथा आर्थिक पूर्वाधारको क्षतिका लागि स्रोत जुटाउनु हो। बाढी प्रभावित क्षेत्रको पुनर्निर्माण र दीर्घकालीन उत्थानशील विकासका लागि आवश्यक थप वित्तीय सहायता परिचालन गर्न विश्व बैंक र अमेरिकी निकायहरूसँग विशेष छलफल हुनेछ।​ साथै, नेपालमा सडक तथा विद्युत् प्रसारण लाइनजस्ता दीर्घकालीन महत्वका आयोजनामा वैदेशिक तथा निजी लगानी आकर्षित गर्दै रोजगारी सिर्जना गर्ने योजनासहित नेपाली टोली वार्तामा प्रस्तुत हुनेछ।