सर्लाहीमा प्रदर्शनकारीमाथि गोलि चलाउदा एकको मृत्यु

In Headlines
January 6, 2024
Sushil Paudyal

पुष २१, २०८० शनिबार

सर्लाही : हिँजो प्रहरी र प्रदर्शनकारीबीच झडप हुँदा सर्लाहीको बरहथवामा एक जनाको मृत्यु भएको छ। मृत्यु हुनेमा बरहथवा नगरपालिका वडा-६ का ३२ वर्षीय जयशंकर साह रहेको सर्लाही प्रहरीले जानकारी दिएको छ।

नगर अस्पताललाई प्रादेशिक अस्पताल बनाउने विषयमा बरहथवा नगरपालिकाका कार्यालय अगाडि शुक्रबार प्रदर्शन भएको हो। प्रदर्शनकारीले ढुंगामुढा गर्न थालेपछि प्रहरीले १३ राउन्ड गोली हवाई फायर गरेको थियो। भीडलाई नियन्त्रणमा लिन १९ राउन्ड अश्रुग्यास समेत प्रहार भएको डीएसपी पंजियारले बताए।

नेपाली कांग्रेसले सर्लाहीमा प्रदर्शनकारीले उठाएको विषयमा गम्भीर बन्न सरकारसँग माग गरेको छ। शुक्रबारको प्रदर्शनका क्रममा सुरक्षाकर्मीको गोली लागि स्थानीय जयशंकर साहको मृत्यु भएपछि कांग्रेसले आज घटनाको सत्य–तथ्य अध्ययन गरी यथार्थ छानविन गर्न माग गरेको हो।

कांग्रेसले हरेक नागरिकले आफ्ना अधिकारको विषयलाई उठान गर्दा शान्तिपूर्ण, मर्यादित र हिंसारहित उपाय अवलम्वन गर्न प्रदर्शनकारीलाई आग्रह गरेको छ। कांग्रेसले सुरक्षा निकायलाई संयमित रहन अपिलसमेत गरेको छ।

सर्लाहीको बरहथवामा कर्फ्युको समय आज बिहान सकिएपछि निषेधाज्ञा जारी भएको छ । घटनालाई लिएर सर्लाहीको विभिन्न स्थानमा बिहानैदेखि प्रदर्शन भइरहेको छ । सर्लाहीको कविलासी, सलेमपुर लगायत ठाउँमा प्रदर्शन जारी छ ।

तपाईंको प्रतिकृया